الطاوسي رجع حتى هو للجامعة وفتحي جمال نايض عليه الصداع

رشيد الطاوسي غادي يرجع حتا هو باش يخدم فالإدارة التقنية الوطنية مع الويلزي روبيرت اوشن.
الطاوسي غادي يتعين في بوست جديد فالإدارة التقنية عندو علاقة بالتكوين والتتبع والتنسيق، في الوقت، لي مازال ماتعرفش البوست، لي غادي ياخد بادو الزاكي، بعدما أعلن هو الأول التحاقه بالجامعة.
الويلزي اوشن غادي يحدد مهام الإطارين الوطنيين بادو الزاكي ورشيد الطاوسي نهار الجمعة جاية.
مصادر “كود” أكدت بلي الجامعة قررت ترجع الزاكي والطاوسي للإدارة التقنية، نظرا الخبرة والتجربة لي كيتمتعوا بها، خصوصا وأنهما دربا المنتخب الوطني مشحال هادي.
فتحي جمال مرشح حتا هو باش يشد التكوين فالإدارة التقنية، وعندو تجربة كبيرة فهاد المجال، لكن نايض عليه الصداع، كاين شي وحدين ما بغينوش يكون فلاديركسيون تكنيك، واخا السيد عندو ما يگول.
ومن المنتظر تعيين مدربين للمنتخبات الوطنية نهار الجمعة جاية، بعدما حدد اوشن اللائحة ديال الأسماء، لي باغيها تخدم معاه.