ها شكون “حمزة مون بيبي” ويقدر يتضرب ب4 سنين حبس

بدات معطيات على “حمزة مون بيبي” مول الحساب الوهمي على وسائل التواصل الاجتماعي اللي تشد مؤخرا وتقدم لابتدائية مراكش. وفق المعطيات الاولية فان الامر يتعلق بشاب من اكادير كيقرا فكلية العلوم الاقتصادية والقانونية جامعة بن زهر اكادير. الشاب اللي اسمو اسامة. ج عندو 23 عام.
قاضي التحقيق بابتدائية بمراكش كان بدا الاستماع لهاد الشاب بعد ما شدوه فاكادير. هاد الشي جا بناء على تعليمات النيابة العامة.
المتهم الرئيسي لحد الان غادي يبقى رهن الاعتقال حتى يسالي التحقيق ومن بعد يتعرف واش بوحدو ولا معاه شي حد. حقاش على حساب ما توصل ليه التحقيق غادي يتم التكييف القانوني للمتابعة.
دابا قضيتو بدات جنحي والقانون فهاد القضية قاصح. هاد مول لحساب الوهمي يقدر يمشي ب4 سنين ولكن العقوبة غادية تزاد بزاف ايلى كان معاه ناس خراين. القضية ديك الساعة جناية.