الازمة غادية وتكبر. القضاء الهولندي حكم على سفارة المغرب بأداء تعويض لموظف والديبلوماسية المغربية قالت ليهم ماشي سوقكوم

الازمة المغربية الهولندية غادية وكتكبر بحال كرة الثلج، ولعل أكبر فواصلها هو سعيد شعو وحراك الريف، لكن المحكمة الهولندية زادت عمقات الهوة اللي كاينا بين البلدين.
المحكمة الهولندية حسب صحافة البلد الاوروبي، حكمات لصالح موظف تعرض للطرد قبل ثلاث سنوات، وحكمات ليه بالاجر ديالو طيلة ثلاث سنوات بالاضافة لإعادته لعمله، وغرامة مالية توازي نصف أجره فثلاث سنوات.
هادشي طبعا ماعجبش المغرب ورد والمستشار القانوني للمملكة رد على الموظف المطرود فرسالة إلكترونية وقاليه راه ماغاديش يتنفذ الحكم.
خبراء هولنديين قالوا بأن هاد الحكم صعيب يتنفذ، حقاش مايمكنش للمحكمة الهولندية تحجز على أي حاجة ديبلوماسية من بينها حتى سيارة السفير، لأن هذا خرق للاعراف الديبلوماسية، لكن السفير عبد الوهاب بلوقي قال للهولنديين حنا باغيين المشكل يتحل ولكن القرار غاتخاذ فالرباط، في إشارة إلى أن القضاء الهولندي ماشي سوقو فهادشي.
العلاقات الهولندية المغربية كدوز فأزمة صامتى بين البلدين منذ ما يقارب عقد، وبدات من لوقت لي ناضت فيه هولندا كتنبش فالخلفية المالية للمتقاعدين لي رجعو للمغرب باش تحرمهم من التقاعد، ثم قضية سعيد شعو لي أسس حركة 18 سبتمبر فهولندا وجاب ليها نشطاء من الريف باش يطالبوا بإستقلال الريف، مرورا بحراك الريف ثم إعتقال سعيد شعو لأجل تسليمه.