ماقدرو على لحمار كيسلخو البردعة. المحتجون دساحة مارشال تحگرو على مصور ديال دوزيم وبغاو يضربوه بسباب الخط التحريري دالقناة

عاينت “كود”، الاعتداء على مصور القناة الثانية دوزيم بساحة مارشال فكازا من طرف المحتجين لي كيضامنو مع الزفزافي ورفاقه.
مجموعة من المحتجين هجموا على مصور دوزيم بمجرد ما دخل يغطي الوقفة الاحتجاجية، وتعداو عليه بالركل وحماوه جوج صحفيين هوما محمد الاعرج ديال فبراير وعبد الاله شبل ديال هيسبريس لي كانو قراب ليه وماخلاو حد يقرب ليه.
هاد التصرف لي وقع فواحد الوقفة نبيلة وذات اهداف مزيانة دفاعا على المعتقلين دحراك الريف تسيء لهاد الرسالة النبيلة لي بغاو المحتجين يرسلوها للدولة.
الصحفيين كعاو ماعجبهومش الحال حقاش المصور الصحفي ماشي هو لي كايدير الخط التحريري ديال القناة هو غير عامل مابغيتيش يصور تقولها ليه بكل ادب بلا ما ضربو ما تعدا عليه.