ها علاش المغرب ما قبلوهش ف”سيدياو”. هو الامي الجاهل ابراهيم الفاسي الفهري كيتلكم باسمنا بلا خبارنا وولى رئيس حكومة وما فراسناش: اولاه لا طفرتوه

كنقولو علاش المغرب ما تقبلش ف”سيدياو”. اخطاء الديبلوماسية ولا اخطاء اللي كيحرك الديبلوماسية ولا رفض الدول الاعضاء وخوفها من هيمنة مغربية. فالاخير ما كاينش هاد الشي.
وكالة المغرب العربي للانباء دارت ليه قصاصة كاع وقدماتو علي سفير المغرب. يتعلق الامر بابراهيم الفاسي الفهري الجاهل اللي ما قراش اللي ضارب عليه بوه الطيب الفاسي الفهري مستشار الملك ووزير الخارجية الاسبق باش يدخلو لمدارس فرنسا ورفضاتو وداه يقرا فكندا.
هادا فالسينغال باسم شي معهد يشببه في تحاليله او سمحو لي فالتحاليل اللي كتعطيه شي جهات فالدولة٬ قال باللي “المغرب، في مسعاه للانضمام للمجموعة الاقتصادية لدول غرب إفريقيا (سيدياو)، لا يسعى مطلقا لعرقلة “المسيرة الاندماجية الناجحة” غرب الإفريقية، ولا “لتغيير طابعها، أو حتى زعزعة توازنها”؟
واضاف فندوة داو ليها الصحافيين المغاربة وخلصو عليهم وحزروهم باش يكتبو على مواضيع عندها علاقة بالسيدياو منها ندوة لمعهد خلقوه ليه البارح الخميس “على العكس من ذلك، فإن هذا الطلب يعكس إرادة مغربية للإثراء المتبادل، والتوازن الموطد والتنسيق الجماعي، وهو ما يعد هدفا استراتيجيا للطرفين ومربحا لكليهما”.
دابا هاد اللي ما طفروش فالقراية قدموه على سفير الملك محمد السادس في داكار واسمه طالب برادة فقصاصة المغرب العربي للانباء. ماشي غير هاد القصاصة. دارت قصاصة اخرى كيتكلم فيها بحال رئيس حكومة منتخب وكيقول باللي المغرب غادي ينضم للسيدياو مع السينغال. شكون انتخب هاد النكرة اللي ما قاريش. قولو لينا
كيفاش بحال هاد اللي ما قاريش يولي عندو هاد الحضوة وعلاش وصلات بلادنا لهاد المستوى. السياسي يتقاتل بكل ما يمكن ان نعاتبه وننتقده٬ فالشارع وهاد الصبي يصول ويجول ويعطي الدروس والموعظة. تفو على وضع وصلنا ليه