الرجاء بداو كيبكيو عوتاني يالاه بداو الموسم بداو كيحتجو على الجامعة

رسل فريق الرجاء الرياضي رسالة احتجاج للجامعة الملكية المغربية لكرة القدم كيحتج فيها على الحكم الهراوي، المنتمي لعصبة سوس، بسباب أنه الفريق الأخضر كيقول أن الحكم حرمهم من ضربة جزاء في الدقيقة 93 من المباراة، بعدما سقط بنحليب في مربع العمليات.
واحتجوا الرجاء على الجامعة معتابرين أن الحكم ضيعهم في ضربة جزاء كون صفر عليها كان ممكن الرجاء اماركيها وربحو الماتش ديالهم، خصوصا أنهم كانوا متعادلين بهدف لمثله.
وطالبوا الرجاء من الجامعة تنصفهم باش ميأترش التحكيم على النتائج ديال المباريات ديالهم، خصوصا أنهم باغين العبوا على البطولة وخاصهم اربحوا نقاط بزاف.
أولمبيك خريبكة حتى هما كانوا احتجوا بقوة على الحكم الهراوي في الماتش لأنه مصفرش ليهم على ضربة جزاء واضحة ديال اللاعب العبوبي لدفعوا شاكير ومخلاهش اسبقو للكورة باش اماركيها ولكن الهراوي قاليهم كملو اللعب بحالا موقع والو، ولكن خريبكة مدارو حتى رسالة للجامعة باش احتجوا عكس الرجاء.
الماتش سالا بالتعادل هدف لمثله، وخريبكة كانوا زكلو ضربة جزاء، عطاها لهم الهراوي في الشوط الثاني، وضيعها تغزوي، بعدما شدها ليهم الحارس أنس الزنيتي.
وكان الجمهور ديال الرجاء تقلق على المكتب المسير لأنه خلى الفرقة حتى نهار الأحد عاد سافروا لخريبكة، وهادي عمرها دارت في الرجاء، الفرقة كتمشي نهار قبل باش تكون مرتاحة في المدينة فين غادي تلعب الماتش.