ابن عرفة بين انو ما فيدوش والمغرب معاه غادي للحيط. ما كيجاوبش على الاسئلة وبارد بلا مشاعر مع قضايا مشعلة الشعب

مرور ابن عرفة العدالة والتنمية سعد الدين العثماني في برنامج خاص بثته "الاولى" و"دوزيم" بين بالوضوح الليلة فاتح يوليوز 2017 ان هاد السيد تجنى على منصب اكبر منو. بين باللي غادي بالبلاد للحيط. غير مقنع لا يرد على الاسئلة. بارد فالوقت اللي مواضيع شاعلة. ما يقنع باش يدافع ما يقنع باش يبرر.
ناخدو موضوع الحسيمة. اختصر هاد الشي اللي واقع فالبلاد باش قال "حنا ما كنهدروش. حنا كنخممو وكنتاصلو". فاش كتخمم فاش كتاصل يا ابو اتصال انت.
كلام انشاء خاوي ما فيه والو. ما جاب خبار. ما عطى اشارات. يعني بين باللي ما صالح والو فالحكومة. السيد سولوه على الاسباب قال "بعد ثمانية اشهو من الاحتجاج "صعيب علي نفسر كلشي" يصعاب علي نقول ليك الاسباب المطلقة
كاين مدخلين سياسي وتنموي"
وباش كملها قال نوجه نداء باش نقول الحكومة خدات الموضوع بالجدية اللازمة. اش كيعني هاد الشي كيعني كون ما دارش فيهم الملك فالمجلس الوزاري الاخير ما غادينش يتحركو. دليل اهانة وادانة ليه ولحكومتو.
السيد جا يهدر على الشغل وتخربيق غريب ولكن باش سولوه على المعتقلين رد هاد الشي ماشي سوق الحكومة "لا دخل لنا في عمل الجهاز القضائي. منذ تنصيب جلالة الملك للمجلس الاعلى للسلطة القضائية". اش من هدوء كتكلم عليه واش من دور للحكومة وهي ما فيدها والو