ومالك هادو ما عرفتيش تفعفعهوم بحال السويد. وزير الخارجية بدل ما ينقذ الخادمات المغربيات في السعودية يالاه قدر يمنع هادوك لي مازال باغيين يمشيو

الحيط القصير لصلاح الدين مزوار هو السويد حقاش مكيفهموش الدارجة المغربية، ويقدر يقول أي حاجة بلا ما يلقى مشكل، أما السعودية فراه ماغاديش تسكت ليه يلا مشا حتى حل فمو فقضية الخادمات المغربيات لي كيتعرضو للاهانة والاحتجاز والسجن والاعتداءات بشكل دائم.
وبعد فضيحة خروج خادمة في مقطع فيديو وتاكيدها على الترهيب الذي تتعرض له من قبل مشغلتها، كان الاجدى بوزارة الخارجية أن تتحرك بسرعة وتطالب بتقديم توضيحات في ما تتعرض له العمالة المغربية بالسعودية، لكن الوزارة إكتفت بإعلان يمنع المغربيات اللواتي يرغبن في السفر إلى السعودية للعمل في البيوت، حيث سترفض إبتداء من 7 دجنبر المقبل التصديق على أي وثيقة بهذا الخصوص.
علاش حتى ل7 دجنبر ماشي هاد النهار؟ ببساطة حقاش كاين واحد الفوج وجد وراقو وخاصنا نعطيوه فرصة يمشي وعاد ديك الساعات نسدو الباب!!.
الخادمات المغربيات في السعودية يعانين الويلات، والديبلوماسية المغربية لي كيترأسها الوزير الفعفاع ماقادة دير حتى حاجة من غير إيقاف تدفق المغربيات للسعودية، بمعنى آخور الفعفاع يقول للسعودية " عفا الله عما سلف " وديكشي لي درتو لبناتنا ماغاديش نهضرو عليه، وديك لي عندكوم شوفو كيفاش ديرو معاهوم.
الاعلان لي دارتو وزارة الخارجية يوضح شيء واحد وهو أن هذه الوزارة إختارت الحل الاسهل لمنع أي إحراج قد تقع فيه مستقبلا، وذلك عبر منع المغربيات من الذهاب إلى السعودية وليس طلب إستفسار من السعودية حول ما يقع للمغربيات من استعباد، هادشي كيبين الخوف الكبير لوزارة الخارجية من الاقدام على أي خطوة لإنقاذ بناتنا من جحيم السعودية.