الوداد شدو الطيارة وبايتين فعاصمة بوتسوانا

مشاو الوداد الرياضي لعاصمة بوتسوانا گابورون، يتسناو الطيارة اللي غترجعهم إلى المغرب، بعدما ربحو اليوم السبت فمدينة فرانسيستوون البوتسوانية فريق گلاكسي البوتسواني ضمن الجولة 5 من دور مجموعات دوري أبطال افريقيا.
الوداد الرياضي وصلو قبل لحظات لگابورون، بعدما خداو طيارة خاصة ناميبية هزاتهم من فرانسيستوون البوتسوانية، وحطتهم فعاصمة بوتسوانا اللي غيباتو فيها هاد الليلة ويظلو فيها غدا حتى يسالي ماتش نهضة بركان فكاس الكاف فجنوب افريقيا، وتجي الطيارة اللي دات الفراقي بجوج من لافريف دي سيد، وتهزهم من بوتسوانا تجيبهم للمغرب.
وللاشارة فالوداد الرياضي حافظ بالرباح ديالو على گلاكسي بنتيجة 1 لزيرو، على الحظوظ ديالو فالتأهل إلى ربع نهائي دوري أبطال افريقيا حتى الجولة السادسة والأخيرة من دور المجموعات، وارفع الرصيد ديال إلى 6 نقاط بالتساوي مع سيمبا التنزاني مع امتياز للاخير بسبب النسبة الخاصة (نتائج المواجهات المباشرة بين الفريقين)، ورا أسيك ميموزا الايفواري اللي تأهل كمتصدر للگروب 2 برصيد 11 نقطة، وگلاكسي البوتسواني رجع للمركز الأخير بعد هاد الخسران وبقات عندو 4 نقاط.
الوداد الرياضي وباش يتأهلو لربع النهائي من دوري أبطال افريقيا، خاصهم يربحو أسيك ميموزا فالجولة السادسة والأخيرة من دور المجموعات، وهو الماتش اللي غيتلعب السبت 2 مارس فتيران مراكش، باش يولي رصيدهم 9 النقاط، ويتسناو سيمبا التنزاني يخسرو مع گلاكسي البوتسواني أو على الاقل يتعادلو، مع العلم ان گلاكسي حتى هما حظوظهم مازال كاينة وأملهم انهم يربحو سيمبا فبلادنا تنزانيا ويديرو 7 بوان ولاسيك تربح لهم الوداد فمراكش، وبالمقابل إذا سيمبا ربحو گلاكسي غتولي عندهم 9 بوان ويتأهلو ما يتسناو حد حيث متفوقين فالنسبة الخاصة على الوداد الرياضي واخا الأخير يربح لاسيك.