فضيحة اخرى للاستثمار السعودي ببلادنا. واش غا ياخدو رزقهم ولا غيظلمو ويضيعو فيه؟.. لي خدامين بفرع شركة الملياردير السعودي الحكير بالمغرب كيواجهو المجهول بعدما تسدو متاجراها استعدادا لإعلان إفلاسها

كيواجه 140 مستخدم، فيهم مدراء وخدامة كلهم فشركة تابعة لفرع "الحكير فاشن" بالمغرب، التي أصبح اسمها مؤخرا "سينومي ريتال"، والتي يديرها الملياردير السعودي عبد المجيد الحكير، مصير مجهول. إدارة الشركة بالمغرب، وفق معطيات توفرت ل "كود"، قربات تعلن على افلاسها.
حتى اليوم هاد الشركة ما دارت حتى شي اشارة باللي غادية تمشي فالمساطر القانونية اللي تكفل حقوق العاملين ديالها فالتعويض اللي يضمن حقوقهم. هادو سنوات وهما خدامين مع شركة قررات هي تفك العقد من طرف واحد اي طرفها هي.
هاد الاطر والمستخدمين وفق شهادات "كود"٬ مدوزين ما بين 8 و12 سنة. موزعين بمكاتب الشركة فعدد من لبلايص فكازا ومراكش. كان احترام تام لشروط التعاقد بين الطرفين يضيف مصادر "كود". ولكن وقع للي ما فكر فيه حد. نزل عليه لخبار بحال شي زلزال زلزل حياتهم اخيرا. فالشهور الاخيرة عاشو كابوس خايب بزاف قبل حياتهم. زعزعها وولى مستقبلهم المهني ومعاه عائلاتهم فكف عفريت.
بين فترة قصيرة تحول الاستقرار فادارة "سينومي ريتال" لقلق ولخوف. عرفو باللي الشركة باغية تسالي نشاطها بالبلاد وتسد متاجر تابعة ليها. السبب هو تراكم ديون لكرا ديال البوتيكات اللي فيها حوايج ماركات عالمية.
دابا هاد 140 مغربي ومغربية فيها اطر ومستخدمين ما عندهم حتى شي خبار. حتى حد ما قدم ليهم اجوبة على تساؤلاتهم. باغيين غير تطبيق القانون فبلادهم. ياخدو حقوقهم كيف كيضمنها قانون الشغل. خايفين على يكون ضحية٬ كيف اكدات شهادات ل"كود".
دابا هاداك لملايري عبد المجيد الحكير ما كاينش فهاد العالم. شي وحدين من هاد 140 عندهم امل فيه. لكن اللي كيوقع هاد الفترة اللخرة كيخلي هاد الثقة مهزوزة عند لخراين. ادارة مازال ما تحركاتش يعني مستقبل كحل يعني تشرد عائلات.
لمغاربة ل140 باغيين الوضوح اللي غايب اليوم. باغيين حقوقهم ماشي يتحكرو ويتكلاو فرزقهم حيت هوما مغاربة. وكان للشركة 17 متجرا بالمغرب، توجد في أكثر المواقع التجارية نشاطا ورواجا. كلشي سد.
وتملك "سينومي ريتال" أكثر من 2000 متجر في 100 مركز تسوق في 14 دولة. وتعرض الشركة أكثر من 88 ماركة أزياء، تغطي الملابس النسائية، والأطفال، والرضع، والأحذية وملحقاتها، ومستحضرات التجميل والترفيه.
هادا نوع من الاستثمارات السعودية اللي كاينة فالمغرب. غير يغرق الباطو يهربو ويخليو عائلات معلقة. الدولة خاصها تدخل اليوم قبل غدا. راه ماشي بلاد سايبة