ماتش فيه اجواء حماسية وارتفاع الرطوبة.. الأسود خاسرين فالشوط الاول مع الكوت ديفوار وسيطرة للايفواريين

خرج المنتخب الوطني المغربي متأخر فنتيجة الشوط الاول من الماتش الودي مع المنتخب الايفواري، وهو الماتش اللي بادي هاد العشية من اليوم السبت فالكوت ديفوار.
وسالا الشوط الاول بين المغرب والكوت ديفوار بنتيجة واحد لزيرو بين المنتخبين، وكانو الايفواريين هما اللي مزيانين سوا فالسيطرة على الكورة والمبادرة، أو من ناحية فرص التسجيل.
منتخب الكوت ديفوار كان قريب يماركي على المنتخب المغربي فالشوط الاول شحال من هدف، وشحال من كورة ضيعو اللاعبين ديالو لولا تدخل المدافعين المغاربة والكول ياسين بونو، وبالمقابل كان يوسف النصيري ورومان سايس هو اللي ممكن يماركيو ليكيب ناسيونال ولكن ضيعو قدام مرمى الايفواريين، ولكن قدرو لاعبين الكوت الديفوار يماركيو الهدف الاول بواسطة لويس كاسيط فالدقيقة الأخيرة من الشوط.
الماتش بين المنتخب الوطني المغربي والكوت ديفوار مفتوح ممكن يعرف اهداف اخرى فالشوط الثاني من الجانبين، وفيه ايضا اجواء حماسية بين الجماهير المغربية والإيفوارية، وبالنسبة للطقس فالرطوبة طالعة وهذا الشي راه خلا الحكم يوقف الماتش فالشوط الاول باش اللاعبين ياخدو الما.