نجوم الوداد جاو للكلينيك عند صاحبهم فلوح اللي حالتو خطيرة

تضامنو لاعبين من الوداد الرياضي مع صاحبهم أسامة فلوح اللي داير كسيدة خايبة، حالتو صعيبة ما بين الحياة والموت بعدما دخل هو وجوج صحابو بطوموبيلتهم فرموك فكازا صباح اليوم الاربعاء.
لاعبين الوداد الرياضي وحسب مصادر مطلعة، بداو كيتقاطرو على الكلينيك اللي ناعس فيه أسامة فلوح، باش يطمئنوا على حالتو الصحية، ومن نجوم الواك اللي جاو عبد الله يحيمود، وسيف الدين بوهرة، وإسماعيل المترجي.
من جهتو نشر مدرب الوداد الرياضي عادل رمزي سطوري فأنستغرام عبر فيه على التضامن مع اللاعب أسامة فلوح، ودعا له بالشفاء، فالوقت اللي الحالة الصحية ديال اللاعب وحسب مصادر من النادي صعيبة.
وحسب المعلومات المتوفرة فأسامة فلوح ناعس العناية المركزة، وعندو كسور فعدد من مناطق الجسم ديالو وبينها العنق والصدر، وعندو حتى نزيف داخلي، وكاينين مجهودات كبيرة من الطاقم الطبي المشرف على العلاج ديالو لإنقاذ حياتو.