غير مشى الجامعي بحالو الماص ربحو وضربو ثلاثة على السوالم ووجدة تعادلو مع برشيد وبقاو بجوج غارقين فالقاع

بداو المغرب الفاسي مرحلة ما بعد الرئيس المستقيل إسماعيل الجامعي بالرباح، وحققو فوز مهم اليوم على شباب السوالم فتيران فاس الكبير، برسم الدورة 5 من البطولة الاحترافية لكرة القدم.
وسالا الماتش بين المغرب الفاسي وشباب السوالم، بنتيجة 3 لزيرو لمصلحة الماص، وماركاهم له محمد البدوي فالدقيقة 49، وجاستين ييري فالدقيقة 72 وزاد فالدقيقة 89.
وبهاد الرباح كيكون المغرب الفاسي حقق ثاني رباح له فهاد الموسم بعد فوز و3 تعادلات، وأول رباح بعد مرحلة الرئيس إسماعيل الجامعي اللي مشى بحالو البارح السبت، وعند الفريق دابا 9 النقاط وكيحتل المركز الثاني مؤقتا، أما السوالم عندهم 6 النقاط ومحتلين المركز 8 مؤقتا.
وفنفس التوقيت وعن نفس الدورة، لعبو الجريحين يوسفية برشيد ومولودية وجدة فتيران وجدة، وسالاو تعادل زيرو لزيرو، بقاو بجوج فقاع الترتيب، وجدة عندهم نقطة واحدة فالمركز 14، وبرشيد عندهم 0 بوان فالمركز الأخير.