مدرب إسبانيا حتى هو متهم بالتحرش الجنسي.. ناض عليه النحل بعدما شدوه حاط يديه على صدر وحدة خدامة معه

نايضة فإسبانيا بسب الشكوك فوقوع حالات تحرش جنسي داخل المنتخب الإسباني لكرة القدم للسيدات، وهذا الشي بعد الواقعة ديال رئيس الاتحاد الإسباني لكرة القدم لويس روبياليس والبوسة الشهيرة ففينال كاس العالم للعيالات اللي باسها للاعبة الإسبانية جيني هيرموسو.
وكيبان أن رئيس الاتحاد الإسباني لويس روبياليس ماشي غير هو بوحدو اللي غيخلص ثمن بوسة الفم اللي باس حيث الاعتذار اللي دار ما قنعوش به الاسبان، ولكن حتى مدرب المنتخب الإسباني للسيدات خورخي فيلدا متورط فقضية تحرش جنسي، ونايض عليه النحل فإسبانيا حتى هو.
وحسب وسائل الإعلام الإسبانية فالمدرب الإسباني خورخي فيلدا تشد فواحد الفيديو، بحالا كيلمس شي وحدة من أعضاء الطاقم التقني للمنتخب الإسباني بطريقة مثيرة جنسيا حيث شدها من صدرها، وهذا الشي فماتش الفينال د كوب ديموند بين إسبانيا والننكليز.
شبكة CNN، كشفت أن اللقطة ديال المدرب الإسباني مع السيدة اللي معاه فالطاقم التقني جات بعد لحظات من تسجيل اللاعبة الإسبانية أولغا كارمونا الهدف الوحيد في المباراة النهائية، وهو يحط يديه ليسرى على كتفها وعنقها ودور راسو ونزل يديه اليسرى لصدرها وبقى حاطها شوية عاد حيدها.
وكيبان أن كأس العالم للسيدات اللي ربحت إسبانيا لأول مرة فتاريخها، غيفركع فضايح أخلاقية وقضايا تحرش جنسي حيث عدد من وسائل الإعلام الإسبانية صبح هذا الموضوع هو الشغل الشاغل ديالها كثر من لاكوب اللي ربحو، وحتى منظمات حقوقية دخلت على الخط وتطالب بفتح تحقيق ويبداو برئيس الإتحاد الإسباني والمدرب د المنتخب الإسباني النسوي، وراه حتى رئيس الوزراء الإسباني أكد أن البوسة د رئيس الاتحاد الإسباني غير مقبولة والاعتذار عليها ما كافيش وطالبو بشي حاجة كثر.