نجاح كبير لمونديال السيدات فأستراليا ونيوزيلندا والدورة محطمة أرقام قياسية

كتعرف مباريات كأس العالم للسيدات 2023، المنظمة بأستراليا ونيوزيلندا نجاح مهم على مستوى الحضور الجماهيري، وراه تباعت كثر من مليون ونصف ديال التذاكر، بعدما دازت 6 يام فقط على الافتتاح.
وشكر جياني إنفانتينو رئيس الاتحاد الدولي لكرة القدم أستراليا ونيوزيلندا اللي منظمين نسخة 2023 من كأس العالم للسيدات، على المجهودات اللي دايرين باش نيفو د كرة القدم النسوية يطلع لمستوى ما مسبوقش على الصعيد العالمي.
ووجه جياني إنفانتينو رئيس الفيفا ميساج للبلدين المنظمين لكاس العالم وقال: "كنشكر بزاف نيوزيلاندا واستراليا حيث ضيفونا عندهم، ودائما ما كنقول أن كرة القدم كتوحد العالم، ودابا راه نيوزيلاندا واستراليا خدامين كيوحدو العالم ومرحبين بنا".
وكمل رئيس الفيفا: "أنا فرحان حيث كاينين مئات الآلاف من الرجال والعيالات والدراري والبنات اللي كيجيو فرحانين يتفرجو فالماتشات والملايين اللي كيتفرجو من ديورهم وهذا راه نجاح كبير وكيتمتعو بالكرة".
وعرف يوم الافتتاح اللي كان يوم الخميس 20 يوليوز، تجمع أكثر من 117 ألف مشجع فإيدين بارك فأوكلاند، وفستاد أستراليا فسيدني كان فيه 42 ألفا و137 شخص حضروا فوز نيوزيلندا فالافتتاح على النرويج، وهذا أكبر عدد حضر ماتش كرة قدم للعيالات فأوكلاند، بينما حضر 75 ألفا و784 مشجع فسيدني لمباراة أستراليا ضد إيرلندا وهي أعلى نسبة حضور في كأس العالم للسيدات لمدة 24 عام، وبعد 6 أيام فقط من افتتاح البطولة تجاوزت الفيفا الهدف ديالها حيث تباعت مليون ونصف مليون تذكرة ديال 64 ماتش.
وبعدما سالا ماتش اليوم الثلاثاء بين كوريا الجنوبية وكولومبيا ضمن الجولة الأولى من المباريات، بلغ إجمالي الحضور ديال أول 16 مباراة 459،547 بمتوسط 28،721 – بزيادة 54٪ مقارنة بأول 16 مباراة د البطولة السابقة ففرنسا عام 2019.
وتحدث إنفانتينو كذلك عن الجمهور العالمي، وذكر أن البطولة معروضة ف 200 منطقة من خلال 130 محطة إذاعية. "عندنا أرقام مشاهدة لا تصدق في جميع أنحاء العالم واللي كتوصل إلى ملياري مشاهد وهذا الشي واعر".