آش جرا؟!..

آش جرا بغيت نفهم
اللي كان يفرحني
رجع سباب الهم
كنا ملي كتطيح الشتا
كنفرحو ونغنيو...
آشتا تا تا ....
كانو الناس كيحفرو المطافي
ويرحبو بها بالقلب الصافي
راه ما كانتش كتسقي غير الأرض
كانت كطهر الأرواح
ولله كيكثر الحمد
حنت كيحسو بللي باغيهوم
وللدعوات استاجب ليهوم
شحال هادي كنعقل
كانت كتصب 15 يوم
وكنرتاحو ويدينا النوم
وحنا فرحانين
وحامدين وشاكرين
وقلوبنا هانيين وحناعارفين
هاذ العام غادي يكون زين
ونحرتو ونربيو لكسيبة
وتا حاجة ما تكون صعيبة
ياك من الما جات الحياة
قالها ربي خالق الأرض والسماوات
آش جرا أخوتي دابا ؟
واش قناطرنا كذابة؟
ولا حسات بالفقر
وغضبات على قلوب الحجر
واش مافيها حديد مافيها سيما ؟
ولا بغات تقول لينا انتما ديما
كتذكرو ايام الاستعمار
وناسيين بللي هاذ الدار
خاصها الصدق والوفا
باش الغضب يطفى
وانتحرت وهي صغيرة
باش تفضح السريرة
ما بغاتناش نقولو أمولا نوبا
بغاتنا نقولو هاذي والتوبة
إيوا سيرو خمموا
وشوفو آش ليكوم علموا
هاذ الفيضانات
والمرحومة القناطر
ها هي جايا الانتخابات
ونعرفوا شكون فيكوم شاطر...