واش هادشي غايأثر على شراكة اسبانيا والمغرب والبرتغال فمونديال 2030.. الحكومة فالصبليون دارت الوصاية على الاتحاد الإسباني بسبب الفساد وخايفين من خرق لقوانين الفيفا

نايضة فالصبليون شريكة المغرب والبرتغال فملف الترشح المشترك لتنظيم مونديال 2030، بسبب تداعيات فضائح الفساد المالي والعزل ديال الرئيس السابق لويس روبياليس بسبب "البوسة صحة" اللي كان دار لواحدة من لاعبات المنتخب الأسباني النسوي، وهذا الشي كامل خلا الحكومة الإسبانية تدير الوصاية على الاتحاد الإسباني، الأمر اللي يقدر يتسبب فمشاكل له حيث قانون الكورة كيمنع تدخل الحكومات فالاتحاد الوطنية، مع العلم ان الرئيس السابق للاتحاد الاسباني لويس روبياليس راه مسدود بعدما سلم راسو للبوليس فالصبليون ومتابع فقضية "البوسة صحة" وقضايا فساد مالي.
وعلنت الحكومة الإسبانية اليوم الخميس، انها دارت اتحاد كرة القدم الاسباني تحت الوصاية ديالها، وقال المجلس الأعلى للرياضة التابع لوزارة الرياضية الإسبانية، أن الحكومة الإسبانية دارت هذا القرار باش تعاود تقاد الأمور ديال الاتحاد الإسباني، اللي كيدوز من وضع خطير، باش يقدر يتجاوز هذا الشي ويستقر الوضع ديالو.
وكشفت جريدة "AS" الإسبانية الشهيرة، أن الاتحاد الأوروبي لكرة القدم اللي كان وجه مراسلة مشتركة مع الاتحاد الدولي لكرة القدم إلى الاتحاد الإسباني قبل اسابيع على شنو واقع عندو بسبب الاعتقالات والتحقيقات بسبب شبهات فساد مالي، (كشفت الجريدة) ان الاتحاد الاوروبي قلق بزاف من قرار الحكومة الإسبانية وتدخلها فالاتحاد الاسباني لكرة القدم، وما متفائلينش بهادشي، وانهم كيعتابرو التدخل الحكومي في انتهاك لقوانين الفيفا، وانه صعيب التمييز بين هاد الحالة وحالات وقعت قبل سنوات مع اتحادات كرة وطنية اخرى.
الجريدة الإسبانية حذرت من ان الاتحاد الاوروبي وفحالة اعتبر ان هذا الشي اللي دارت الحكومة الإسبانية هو تدخل فالشؤون ديال الاتحاد الاسباني لكرة القدم، وفيه خرق لقوانين الفيفا، فالمنتخبات والأندية الاسبانية، غتكون فخطر بسبب عقوبات تقدر تنزل على الاتحاد الاسباني وتمنع مشاركتها فالمسابقات ديال الكورة الاوروبية.