شدو البوليس ديال الصبليون لويس روبياليس الرئيس السابق للاتحاد الاسباني لكرة القدم فالمطار ملي رجع لإسبانيا، حيث متابع فقضية فساد مالي وغسيل أموال والانتماء لمنظمة إجرامية، وهذا الشي من غير القضية المتابع فيه ديال "البوسة الصحة" اللي كان عطى للاعبة منتخب اسبانيا جيني هيرموسو ففينال مونديال لعيالات 2023. البوليس الإسباني شد لويس روبياليس فالمطار ملي رجع لإسبانيا من الدومينيكان اليوم الاربعاء، ودخلت الصطافيط حتى لحدا الطيارة اللي جا فيها وهزاتو داتو لمكتب التحقيقات، فين غيكون الاستنطاق ديالو فالمنسوب له من تهم، وباغيين يقلبو له التيليفونات ديالو بعدما قلبو له دارو قبل ايام. وموجهة للويس روبياليس تهم الفساد المالي والتجاري وغسيل الأموال، واستخدام صحابو كغطاء والاشتباه فاستغلال علاقاتو مع سياسيين فاسبانيا والتقرب من الحزب الاشتراكي الإسباني باش يقدي الأغراض ديالو، وهادالشي بالإضافة إلى أن المدعي العام الإسباني طالب بالحبس ديالو عامين ونص فقضية "البوسة صحة"، والحادث اللي بسبابو تدخل الاتحاد الدولي لكرة القدم ووقفو على ممارسة المهام ديالو كرئيس للاتحاد الاسباني للعبة قبل ما يتم العزل ديالو من المنصب.