ڭالوا درعة تافيلالت

الزجال عمر حمداوي
يلا همك حالي
ديري السبة بحصلابان
والكافور والريحان
وميعادنا درب العطار
نحكي لك
على ما جرى وطرى لي
ف زمان حالو ما يخفاك
يا لالة عروس الدوار
سوكي وكحلي عويناتك
واجي وهديني وذيناتك
ويلا بكيب عذريني
سيدي ربي عالم
مال قلبي محتار
***
أنا اللي سولت شلى من هواوي
على هاد التقسيم الجهوي
وحال واحتنا يا حضار
ڭالوا لي
حمار الشيخ
ما ناض ما ناض
وزادوه قنطار
***
واحتنا يا واحتنا
يا اللي فيها راحتنا
يا الغارقة ف شر لبحار
ظلموك ألالة
وكذبوا عليك
كذبة مكرمة
فعز النهار القهار
ألف تخميمة وتخميمة
ولا ضربة بالمقص
ردموها حية
ما بين شلى حجار
***
ڭالوا درعة تافيلالت
حسبونا ناعسين
على وذنينا
ما سا يقين خبار
وحنا شحال قاسينا وعانينا
وكحال السعد بدى فينا
وشربنا المرار
سالوا عسو وبسلام
سالوا زايد وحماد
سالوا الطلبة لخيار
يا ما داز علينا فالزنازن
أبريا بالصدمة ولاوا زنازن
وشكون شكون
يجبر هاد الاضرار
فين حقنا فالمعادن
فين نصيبنا فالمخازن
واللي نبت فينا
فرفر وطار
بيوض
حفار قبور النخل
ما خلى تمرة
ما خلى جمار
الفلاحة فبيت الراحة
يا المغرور بالسياحة
والشبان سال عليهم
ورقة الكار
***
ڭالوا درعة تافيلالت
وتافيلالت بالكفة
ودرعة بالطارة
طلابات من دار لدار
قلة الوالي
والجيب الخالي
واللي بداتوا العلايل
كملوا تقسيم العار
***
نبكي وعلاش ما نبكي
على ما داروا فينا الكبار
والناس ساكة
غير اللي هدى ربي
وڭال هذا عار هذا عار
تافيلالت بلادي
وبلاد اجدادي
ماشي من جا يجرب
ويقول هذا فار
***
وحلة هذي واشمن وحلة
فاش حنا
وأنت فين غادي بينا
تعالى ياودي تعالى
تعالى نعاودوا لعبار
أنت قولي علاش بنيت
وأنا سمعني وفهمني
ويلا خطيت
كري على ودي ڭزار
يقطعني طروف طروف
بحالي بحال خروف
ويشويني فوڭ النار
قابل قابل
وعلاش لا
غير قيل عليك بلادي