شوفوني كنشر الفرحة وسط الأطفال.. البرلمانية لحموش لي طلعات بالريع لمجلس النواب لاحت صورة مع أطفال وعلقات: أجمال إحساس تجيب السعادة لشي واحد ونسات باللي حماية الأطفال كتبدا من التصاور. ما يمكنش توري وجوه أطفال وتدعي حمايتهم وسعادتهم

نشرات البرلمانية سكينة لحموش، للي طلعات لمجلس النواب عن طريق اللائحة الجهوية للنساء حينت باها برلماني وقيادي فالحركة الشعبية، صورة مع أطفال وكتبات فالأنستغرام ديالها: "أجمل إحساس تجيب السعادة لشي واحد".
يا لحموش، لي حطيتي صورة فأنستغرام لبارح بالليل، وماحميتيش الأطفال ونشرتي صورهم، ونسيتي يا هاد البرلمانية بللي حماية الأطفال كتبدا من التصاور، حينت ما يمكنش تصوري وجوه أطفال وتدعي الحماية ديالهم وسعادتهم. راكي كتبيني بلي أنك ما تستحقيش تكوني برلمانية.
ويلا بغيتي دخلي السعادة للأطفال فرحيهم وديري الخير فدار الأيتام بلا ما تلوحي تصاور ودايرة فيها: "شوفوني كندير الخير"، راه هادشي مبقاش عمل جمعوي راه هادي دعاية سياسية لك ولحزبك.
وكيبقا التساؤل كيفاش وحدة بهاد التصرف تقدر تدخل البرلمان؟