ناضت فالمكتب السياسي للبام. مصدر ل"كود" كان فيه اجماع على دعم وهبي فقضية المحاماة ومصدر اخر ل"كود": ما يمكنش تدعم تصريحات غير شعبية

قبل قليل سالى اجتماع للمكتب السياسي لحزب الاصالة والمعاصرة بمقر الحزب فالرباط. هادا اول اجتماع للحزب بعد فضايح كونكور المحاماة وتبعات هاد الشي من تصريحات ووو.
وفق عضو فالمكتب السياسي ل"كود" فالاجتماع حضي ب"دعم كلي من اعضاء المكتب السياسي" ضد "ما وصفوه بالحملة التي تعرض لها وزير العدل الامين العام للحزب عبد اللطيف وهبي.
وحسب نفس المصدر ل"كود" ف"بيان المكتب السياسي لي غادي يخرج، غايكون فيه دعم وهبي فهاد المحنة ديال كونكور المحاماة".
مصدر اخر من نفس المكتب نفى هاد الشي ل"كود" "ايلى بغى يكتب فالبيان باللي تم دعمو بالاجماع يكتب. ما يمكنش تدعم تصريحات غير شعبية. ما يمكنش تدعم اللي كيمس بالجامعة المغربية. الجامعة اللي كيقرا فيها ولي العهد وقرا فيها جلالة الملك محمد السادس" يضيف مصدر "كود".
وكشف مصدر قيادي مقرب من وهبي ل"كود" أن الاجتماع عرف بعض النقاش والخلاف بين بعض القياديات بخصوص مؤتمر نساء البام، حيث دافع البعض على الغاء منظمة نساء البام وتشكيل منظمة مستقلة عن الحزب.
واضاف المصدر ل"كود" ان قيادية بدات تناقش الموضوع، جاوبتها قيادية اخرى بالقول :نتي كاع مكتحضريش الاجتماعات، حسب مصدر "كود". هاد الشي اكدو عضو اخر فالمكتب السياسي ل"كود" غير هو زاد باللي ناضت فالاجتماع بزاف وهاد الشي ما عندو علاقة باللي كيحضر من اللي ما كيحضرش وباللي القضية عندها علاقة بالحزب بتوجهاتو باختياراتو