شكوك كثيرة فلوائح نتائج كونكور المحامين..الفايسبوك شاعل وللي سقطو دعاو للاحتجاج والوزير ضارب الطم..ومصدر بوزارة العدل ل"كود": لي نجحو 800 وهوما لي يستحقو

حصلت "كود" على دليل يثبت أن عدد الناجحين الحقيقي فمباراة الأهلية لممارسة مهنة المحاماة هو 800 متباري فقط من أصل 17 ألف دوزو هاد الكونكور، يعني الباقي مجابوش المعدل، حسب مصدر بوزارة العدل.
دبا 1200 لي زادو فهاد لاليست ديال الناجحين ما كيستحقوش. ولكن وزير العدل دافع باش يبقا العدد ف2000 ولذلك اقنع اللجنة لي فيها القضاة والمحامين باش يطلعو العدد من 800 الى 2000، بعدما تعاود التصحيح كامل.
التصحيح كيكون ب3 أجهزة الكترونية كتعطي النتيجة ديال الامتحان لي كولو مبني على QCM، حسب مصدر بوزارة العدل واللي نفا يكون التخوفيش.
لاليست النهائية عامرة بأبناء وبنات المحامين ووكلاء الملك والقضاة، هادشي بالنسبة لمسؤول بوزارة العدل "هادشي عادي جدا، هادو تدربو مزيان على المحاماة عن طريق مكاتب ديال الاباء ديالهم".
دبا حاليا الوزارة ضربات الطم، والصفحات الفايسبوكية شاعلة وكاينا مطالب بفتح تحقيق وكاين كاع لي بغا يحتج قدام البرلمان.
مصدر بالوزارة قال ل"كود" :"لي بغا يتأكد من النقطة لي جاب مرحبا به، وحنا مستعدين نصححو معه".