كيفاش عايشين الاسود السدان اللي تفرض عليهم. وحيد: ماشي ساهلة ولكن كنسمع الشطيح والغوت وسايس: كنلعبو الكارطا والمورال مزيان

المنتخب المغربي لكرة القدم اللي غدا غادي يلعب اول ماتش ديالو فالكان بملعب احمدو احيدجو بالكاميرون ضد غانا وصل لهاد الدولة هادي 7 ايام. دخل فعزلة باوطيل مون فيبي اللي مطرف على لمدينة.
مدرب الاسود قال باللي هاد العيشة ديال لوطيل وكلشي مغلوق عليهم "ماشي ساهلة للعابة" واكد باللي "لوطيل كناكلو ونرتاحو ونخرجو ندربو فالتيران" هاد الوضعية اللي شوية صعيبة كيف رجع وحيد ووصفها٬ خلات اللعابة يخلقو اجواء بيناتهم. وحيد قال فالندوة الصحافية باللي لعابة كيتاصلو بعائلاتهم وكيهدرو معاهم وكيلعبو بيناتهم وكيشطحو وكيغوتو.
فهاد الاجواء الصعيبة اللي تفرضات عليهم "خلقو اجواء زوينة" بيناتهم.
عميد الاسود غانم سايس وصف الظروف لحد الان باللي "زوينة" وقال "كنلعبو الكارطة ونرقصو وكنشطحو" ثم اضاف "الوقت كيدوز بالزربة"
وهدر على هاد الاجواء الايجابية "عايشين مزيان وهاد الشي غادي تؤثر على النتائج"