التفلية والعبث صافي. الملك عفا وزيرة الصحة بعد سيمانا من تعيينها ورجعو اللي دخل الصحة فالحايط والتبريرات ما شاداش

بيان صادر من الديوان الملكي حيد وزيرة الصحة نبيلة الرميلي سيمانا بعد ما تعينات فبلاصتها. التبرير اللي عطاه الديوان الملكي هو "طبقا للمقتضيات الدستورية، وبناء على الطلب الذي رفعه السيد رئيس الحكومة، للنظر السامي لجلالة الملك، بإعفاء الرميلي من مهامها الحكومية، التي قدمت ملتمسا قصد التفرغ الكامل لمهامها كرئيسة لمجلس مدينة الدار البيضاء، بعدما تبين لها حجم العمل الذي تتطلبه منها هذه المهمة التمثيلية، وما تقتضيه من متابعة مستمرة لقضايا سكانها وللأوراش المفتوحة بهذه المدينة الكبرى، مما سيؤثر على الالتزامات الكثيرة والمواكبة اليومية التي يستوجبها قطاع الصحة، لاسيما في ظروف الجائحة".
الجزء الثاني من البيان الغريب هو تعيين خالد ايت الطالب فبلاصتها. وزير كيقول عليه الديوان الملكي باللي دارو باش يستكمل "الأوراش المفتوحة والتحديات الملحة لقطاع الصحة، وعلى رأسها مواصلة تدبير الجانب الصحي لوباء کوفيد 19، وحسن سير الحملة الوطنية للتلقيح". واليوم بالضبط دارت وقفة احتجاجية تطالب بمحاكمتو هو ومديرة مديرية الادوية.
ما فهمنا والو. شكون ورا هاد ايت الطالب اللي فشل فكلشي وهاد الشي ديال التلقيح دارتو الداخلية وهو دخل فمعارك مع ناس الصحة.
ثم راه ماشي هي اللي عمدة مدينة فالحكومة. راه كاينين وزراء خراين. المنصوري وزيرة السكنى وعمدة مراكش ووهبي وزير العدل وعندو المجلس البلدي لتارودانت واخنوش رئيس الحكومة عمدة اكادير. علاش تم اختيارها هي بالضبط.
اييه يا سيدي كازا محتاجة لعمدة متفرغة. علاش هادي اسبوع تم تعيينها فهاد المنصب. من اللول ما يعينوهاش وصافي