فهم تسطا.. محامي مصري رفع دعوى على بلوكَر حيت تصورات بكسوة العرس مع كلب

خلقات البلوكَوز المصرية "هبة مبروك" اللي متابعها أكثر من مليون واحد في انستكَرام بوز كبير بعدما دارت شوتينكَ مع كلب.
هبة حطات تصاور شونتيكَ لابسة كسوة العروسة ومعاها الكلب معلق في عنقو "حفل زواج" وكتبات على البوسط "ظل كلب ولا ظل... كملو الجواب"، وقصدات "ظل راجل ولا ظل حيط".
دار الإفتاء المصرية دخلات الخط وقالت أن هادشي اللي دارت "هبة مبروك" هو بحث على اللايكات والشهرة وأن الزواج شي حاجة كبيرة في الدين وماشي مزيان السخرية منو أو الاستهزاء به.
وكيف ديما، صحاب الحسنات في مصر على القرص، وناض محامي رفع عليها دعوى قضائية وقال أن هادشي اللي دارت هو إهانة لبنادم وخاصها تتعاقب.
اليوم خرجات "هبة" في فيديو باليوتوب مدة ديالو 10 دقايق وقالت أن داكشي غير شوتينكَ وقالت هادشي كامل غير تخربيق وتصدمات من الصحافة اللي كتبو عليها كلشي هاد الخبار.
وحيدات من بعد التصاور اللي فيهم الكلب من البوسط ديالها.