فاجعة.. شخص داز فيه تران فالخرجة ديال فاس والجثة ديالو حصلات فاللوكوموتيڤ.. وكونترولور ل"كود": هذا راجل كبير وبلا شك انتحر

تران ضرب راجل، قبل قليل من اليوم الثلاثاء، على السكة، فالخرجة ديال فاس اللي كتدي لمكناس، قرب محطة فاس.
وحسب ما عاينات "كود"، مجموعة من ليكونترولور خرجو يقلبو على الجثة اللي تلفات، بين العربات وفالناواحي، وفاللول ماكانش باين ليها الأثر، بلا مايكون لا دم لا والو اللي يقدر يعطيهم انديس، حتى لقاوها من بعد حاصلا فاللوكوموتيف (فالراس).
وهذشي وقع مع التران رقم 122 من نوع "الأطلس"، اللي كان غادي من فاس فاتجاه مراكش، واللي توقف مع جوايح الوحدة، وباقى لحد الساعة حابس بسباب الحادثة، الشي اللي خلا الركاب يستنكرو بسباب هذشي.
وحسب تصريح كونترولور ل"كود"، فالأمر كيتعلق براجل كبير شوية فلاج.
وأكد الكونترولور أن هذي ماتكون غير حادثة انتحار، حيت الشيفور شافو قاطع السكة وجاي مقصد لجهة التران، فالوقت اللي كان من الممكن يتجنبو، قبل ما يدير الشيفور فران سيك، ويضربو واخا هكذاك.
وحاليا كيتم انتشال الجثة من محرك التران، كيف جاو البوليس ياخدو معطيات حول الحادثة وظروفها وملابساتها.