وحلة كبيرة لوزير الصحة.. مصدر ل"كود": تخزين لقاح كورونا معضلة كبيرة والى متخزنش فدرجة معينة غادي يخسر ومغاتبقاش عندو فائدة

تخزين اللقاحات وحلة كبيرة لوزارة الصحة، لأن الأمر يتعلق بالملايين من الجرعات ديال لقاح كورونا، لي كتحتاج درجة حرارة معينة. اذا لم يتم الاحتفاظ بها ف درجة معينة اثناء التخزين غايولي لقاح خاسر.
منظمة الصحة العالمية كتقول بلي " الضبط الجيد لدرجات الحرارة أثناء تخزين ونقل اللقاحات هو أمرٌ حرجٌ لضمان فاعليّتها وسلامتها".
النقل والتخزين، كيحتاج امكانيات خاصة وثلاجات من نوع خاص. واش المغرب موجد لوجستيكيا لهادشي.
لحد الآن مكاينش شي خطة على التخزين والتنقيل. هادشي مهضرش عليه وزير الصحة، لأن "هاد لموضوع اهم من التوقيت واهم حتى من الثمن"، التخزين والتنقيل غادي يكون مصيري ف فعالية اللقاح.

نرجعو لمنظمة الصحة العالمية اش كتقول على خطوة التخزين ديال اللقاح، كتقول :"عندما يتضرّر اللقاح نتيجة التجميد، فإنَ الفاعِليّة المفقودة لا يمكن أن تُستعاد، فالضررَ دائمٌ. تتصف اللقاحات المتضرِّرة نتيجة التجميد باسْتِمناع أقل، كما وتزداد احتماليّة تسبيبها لتفاعلات موضعيّة كالخرَاجات العقيمة".
وزير الصحة باغي يطلع بطل على ظهر اعلان عملية التلقيح. ولكن عمرو كان واضح مع المغاربة، بلي هاد العملية ديال التلقيح معقدة.
مصدر مسؤول بوزارة الصحة قال ل"كود" :"نخافو لا تكون عملية التلقيح فضيحة جديدة في سماء القطاع الصحي بالمغرب، بسبب تدبير هاد المسؤول".
ف "كود" مابغيناش نموهو الرأي العام ونعطيوهم معطيات مغلوطة، موضوع القاحات بحثنا فيه، ولحد الآن مزال مكايناش خطة واضحة، خطة وبرنامج واضحين فيهم اللوجستيك وشكون غايتكلف بعملية التلقيح وفين وشمن فئة ووو. لحد الآن كاينين تسريبات اغلبها سيناريوهات ماشي برنامج عمل.
أسئلة كتبقا عالقة : فين ايكون التخزين ديال جرعات اللقاح ؟ (مصدر مديرية السكان قال ل"كود" مزال موجداتش خطة التخزين)، شحال الثمن التقريبي ديال اللقاح؟ (مزال تاهو)".
الاعلان عن التلقيح ماشي هو بداية التلقيح. ما حد مقالو فين غايتم تخزين اللقاح راه مكاين تا حاجة، وفق مصدر كود.
مثلا المغرب غادي يجيب تقريبا (وفق تصريح وزير الصحة)، من الشركة البريطانية استرازينيكا 17 مليون جرعة مع 3 ملايين إضافية اختيارية، تكفي لتطعيم ما بين 8.5 إلى 10 ملايين شخص. فين غايحطهم واش عندو التخزين الكافي؟ سؤال معلق.