اللي بغا يتعالج من كورونا خصو يحك جيبو.. "كنوبس" ما غاترد لا ريال لا جوج – وثيقة

فورقة داخلية خاصة بيها، الصندوق الوطني لمنظمات الاحتياط الاجتماعي "كنوبس" أكدات على أن جميع مصاريف العلاجات والإجراءات الطبية اللي ممكن يديروها المصايب بكورونا، من كَلاسهم فالكلينيك والراديو والفحص والتتبع ديالهم، مايمكنش الميتييل تتكلف بالتغطية الصحية ديالهم، وبالتالي المريض خاصو يخلصهم من جيبو.
وقالت "كنوبس"، وهي الميتييل ديال اللي خدامين فالقطاع العام، أن هذ مرض "كوفيد 19" كيتعتبر من الأمراض اللي عندها طابع وبائي، وفالأصل التريتمون ديالها كيخص تتكلف بيه وزارة الصحة، وماكاينش ضمن قائمة البرامج الصحية اللي كترد عليهم الميتييل الفلوس للمرضى، أي كتتكلف بتعويضهم بنسبة من الفلوس اللي خسرو، وهذ البرامج كتحددها المادة 7 من القانون 65.00 وهو بمثابة مدونة التغطية الصحية الأساسية.