بعد القهاوي والريسطورات.. قرار بإغلاق السويقات مع 2 والحوانت مع 6 فبني ملال

عرفات "كود" من مصادر محلية أن والي جهة بني ملال خنيفرة عطا تعليماتو بإغلاق كَاع المحلات التجارية فإقليم ابني ملال ابتداء من الساعة السادسة، بينما الأسواق الشعبية غدي تسد مع الجوج ديال النهار، وهذشي بعد ارتفاع الإصابات بكورونا فالمدينة.
وحسب المصادر نفسها فالمراقبة غادي تولي متشددة كثر فالدخلة ديال المدينة، ويتم اشتراط التوفر على رخصة التنقل الاستثنائية بالنسبة للناس اللي جايين من المدن الثمانية اللي منعات الداخلية الخروج او الدخول إليها، ومن بينها مراكش وكازا اللي مابعادش بزاف على بني ملال.
وغير هذ الأيام، الوالي دالجهة صدر قرار بضرورة إغلاق القهاوي والريسطورات مع الستة ديال العشية، وهو القرار اللي خلا بزاف منهم ينتفضو ويعبرو على استنكارهم، على اعتبار أنهم دوزو دوزو وقت صعيبة وانهم كيعانيو من أزمة خانقة بسبب كورونا والإغلاق مع الستة غيخلي أزمتهم تتدهور كثر.
الجمعية الوطنية لأرباب المقاهي فبني ملال اعتبرات القرار "غير مسؤول" وقالت، فبلاغ ليهم، أنه "لا يراعي مصالح أرباب المقاهي والمطاعم ولا ظروف عيش شغيلة هذا المرفق الاقتصادي الهام، ولا يأخذ بعين الاعتبار كل الإكراهات التي يعيشونها منذ شهر مارس والتي أفرزت تراكمات ومتأخرات أدت بالبعض إلى الإفلاس".