تناقضات أرقام الوفيات بين الوزارة والمديريات.. اليوبي كيوضح ل"كود": كنتعاملو مع 83 عمالة وإقليم والاختلاف فرقم أو جوج بسيط وماكيديرش الفرق.. الوزارة كتعتمد الإصابات اللي تفاليداو فتوقيت معين

تناقضات مختلفة كاينة فأعداد الإصابات والوفيات بين وزارة الصحة والمديريات الجهوية اللي تابعة ليها، ومن ضمنها الاختلاف فأرقام الوفيات الجديدة اللي تسجلات فحصيلة 5 ماي، بحيت كانت الوزارة علنات على 2 وفيات جديدة، بينما علنات المديريات على 4، فنفس الوقت والفترة الزمنية.
لغدليه 6 ماي، هذ جوج وفيات اللي بقاو تنساو، تم الإعلان على وفاة جديدة، وهي الوفاة اللي انضافت لحصيلة جهة طنجة تطوان الحسيمة، دون حديث على الوفيات بجوج د5 ماي أو إضافتهم للحصيلة.
محمد اليوبي، مدير مديرية الأوبئة ومحاربة الأمراض، وضح ل"كَود" سبب التناقضات فالأرقام بصفة عامة، كيقول: "منين كنبغيو نعطيو المعطيات ديال الحصيلة اليومية كنحبسوها مع 3 دالعشية، وعندنا تطبيق معلوماتي كيعطيك المعطيات في حينه باش مانضيعوش الوقت، هذ المعطيات على كل نصف دقيقة كتتبدل، وهذ الشي طبيعي".
وكشف اليوبي بللي الوزارة دايرة تطبيق كيفاليديو من خلالو المديريات الحالات اللي كتزاد، والوزارة بالتالي كتعتمد الحالات اللي تفاليداو فواحد التوقيت معين، أما إلى شي عمالة دخلات حالة وفاة أو شفاء جديدة خارج داكشي اللي تفاليدا، فالوزارة مكتعتمدهاش، حيت ماتأشرش عليها قبل، واللي بقا ليها خاص تحسبو مع حصيلة الغد.
وأكد المسؤول الصحي بللي صعيب يكونو المعطيات بين الوزارة والمديريات بحال بحال، حيت "كنتعاملو مع 83 ديال العمالات والأقاليم و12 لجهة، وحنا اللي كيهمنا هوما المعلومات اللي كنبنيو عليهم باش كنديرو تحليل الحالة الوبائية ونقترحو قرارات على الوزير أو الحكومة، حنا كنبغيوهم يكونو مدققين لدرجة كبيرة لكن ماشي بنسبة 100 فالمية، أما إلى نقصات حالة وفاة وحدة أو جوج ماشي مشكل، حيت بالنسبة لي على الصعيد الوطني شنو الفرق إلى كان عدد الوفيات 185 أو 186، حنا كنهتمو بالنسبة المئوية على الصعيد الوطني، وحالة ولا جوج غتتسبب فاختلاف بسيط مكايديرش الفرق"، على حساب هضرتو.