حضيو راسكم من تطبيق الندوات الإفتراضية "زووم".. مديرية نظم المعلومات: الموقع مامحميش مزيان ويقد يتختارق

حذرات المديرية العامة لأمن نظم المعلومات، تابعة لوزارة الدفاع الوطني، المستعملين ديال منصة "زووم" من اختراق حسابهم وجميع معطياتهم الشخصية، بسبب واحد الخلل معلوماتي فالموقع اللي ماعندوش حل ومايمكنش يتصحح.
وقالت المديرية، من خلالو كيمكن لشخص ما يهاجم الحساب ديال أي واحد كيستعمل هذ السيستيم، من خلال رابط خبيث يرسلو ليه، وديك الساعة غايسهال على الهاكر يدخل للكونط ديالو "ويندوز"، ويحصل على المودباس، ويعرف معلوماتو الشخصية والسرية.
وعلى هذشي، كتطلب المديرية من الناس اللي كيستعملو معلومات حساسة يبدلو الموباس ويوقفو الاستعمال ديال هذ الموقع، بالإضافة لأنهم يسارعو بتغيير كَاع المدوباسات اللي داخلين بيها لحسابات "ويندوز"، وهذا هو الحل الوحيد اللي بين يديهم.
وللإشارة، فمجموعة من الهيئات استعنات بتطبيق "زووم" باش تعقد اجتماعاتها، وكذلك الجامعات المغربية اللي اعتمدات عليه فالندوات عن بعد، ومن ضمنها جامعة ابن زهر بأكادير، وهذشي من بعد ما تفرضات حالة الطوارئ الصحية بسبب فيروس "كورونا" المستجد، وصبح من اللازم عقد ندوات افتراضية من بعد ماكَلسو الناس فديورهم.
وماشي مديرية نظم المعلومات هي أول مؤسسة حذرات من زوم، مجموعة من الدول منعات الخدمة بيه، وكاينين خبراء فمجال المعلوميات حذرو منو كذلك، بحكم أن بزاف ديال ليهاكرز دخلو ليه، وخصوصية الناس اللي كيستعملوه صبحات فخطر.