ميد راديو بطل الاذاعات الخاصة. لاح كلشي وما كاينش اللي فات 10 بالمائة من نسب الاستماع. علاش مازال كيديرو “اذاعة محمد السادس للقرآن” فهاد المسابقة؟ وقتاش يوقفو هاد العبث

“ميد راديو” زاد هرب على باقي الاذاعات الخاصة وشاد المرتبة الاولى وقرب من اذاعة محمد السادس ديال القرآن. هاد الشي اللي بيناتو نتائج الاستماع للاذاعات اللي نشراتها “ميديا ميتري المغرب”.
خرجات الاحصائيات متعلقة بالربع الاخير من 2019 =من اكتوبر حتى دجنبر اللي فات= المتعلقة بينات باللي “ميد راديو” وصلات نسبة استماع معدلها إلى 12.56 في المائة خلال أيام الأسبوع (من الاثنين إلى الجمعة). يعني قريبة بزاف ل13 بالمائة. باش تكون عندكم فكرة الاذاعة الثانية اللي هي “هيت راديو” ما فاتتش 10 بالمائة وحققات 9.90 في المائة.
“ميد راديو” جات الاولى حتى فالويكاندات. يسمعوها 10.36 في المائة. تابعاها ديما “هيت راديو” ب10.02 بالمائة.
يعني انها هي الاذاعة الاولى فالاذاعات الخاصة من كاع الاجيال. فهاد الاحصائيات جات اذاعة محمد السادس للقران هي الاولى ب14.80 في المائة.
هنا ديما كيطرح مشكل. موحالش شي نهار شي حد يقدر يقول باللي هاد الاذاعة ماشي هي الاولى. فالحقيقة ما خاصهاش تكون كاع فالاحصائيات ديال “ميديا ميتري”.
حقاش ما تقدر دير لا اشهار ما عندهاش ابداع فالبرمجة وما محتاجاش دير مجهود. ما عندهاش بلاصتها كاع فهاد ميديا ميتري