الانفصال تحدى الملكية فاسبانيا. الانفصاليون الكاتالان: الملكية ما كتمثلناش وملك اسبانيا ما عندوش شرعية سكان شعوبنا” وفيليبي السادس: اسبانيا خاصها تكون لكلشي ومع كلشي

المجموعات الانفصالية فالبرلمان الاسباني ما قبلاتش فيليبي السادس ملك ديالها. هاد المجموعات ناشطة بزاف فكاتالونيا والباسك. اليوم كان افتتاح الملك ديالهم البرلمان وهاد المجموعات قاطعات خطابو. افتتاح جا فوقت صعيب فتاريخ الجارة الشمالية. المد الانفصالي وصل للبرلمان بشكل ما مسبوقش. هاد الشي علاش احزاب فالباسك وكاتالونيا وگاليسيا الممثلة فالبرلمان الاسباني علنات على ان ملك اسبانيا لا يمثلهم. هاد الاحزاب لعبات دور كبير باش تشكل حكومة ائتلافية بين الاشتراكيين وبين اليسار الراديكالي بوديموس. يعني ان بيهم واقفة هاد الحكومة بعدما قررو يمتانعو على التصويت نهار مصادقة مجلس النواب الاسباني على حكومة الاشتراكي بيدرو سانشيث. المقابل هو ان هاد الحكومة تجلس معاهم على طاولة المفاوضات بخصوص مطالبهم بالاستقلال.
الناطق الرسمي باسم “الجمهوريون الكاتالان” في مجلس النواب گابرييل روفيان قال “الملكية الاسبانية ما كتمثلناش. المجتمع الكاتالاني والباسكي والغاليسي يرفض مؤسسة فاتها الوقت ومن الزمن الماضي وريثة فرانكو اللي باغية تفرض وحدة اسبانيا وتنكر الحقوق المدنية لناسها” كما اكد ان ملك اسبانيا ماشي “مخاطب مناسب” حقاش “ما عندوش شرعية سكان شعوبنا”
الملك فيليبي السادس دار خطاب وحدوي شدد فيه على الحوار وبالحوار يتم تجاوز كاع الخلافات. الملك قال باللي اسبانيا ما خاصش يكورنو شي وحدين ضد شي وحدين خاصها تكون لكلشي ومع كلشي”.
احزاب المعارضة هاجمت حكومة الاشتراكيين على ترويج حلفاءها لخطاب بحال هادا. الاشتراكيون ردو باللي عندهم احترام لهاد المؤسسة.
فخطاب الملك صفقو ليه احزاب ورفضات احزاب تصفق. فنواب اليسار الراديكالي “بوديموس” ما صفقوش وزعيمهم اللي ولى نائب رئيس الحكومة وفسابقة صفق لخطاب الملك.