سكان شفشاون تخلعوا.. الغابة تحرقات عاوتاني والعافية قرابات توصل للمدينة

علمت “كود” من مصادرها الخاصة بللي العافية شعلات، ليوم الجمعة مع الوحدة ديال صباح، فغابة شفشاون، وتحديدا فجبل سيدي عبد الحميد.
المصادر نفسها قالت بللي هاذي ماشي أول مرة تشعل العافية فهذ المنطقة، لكن هاذ المرة شعلات قريب بالزاف من المدينة ومن البوطوات ديال الضو، وهاذشي اللي خلق حالة من الرعب والخلعة عند السكان.
وبعد ثلاث ساعات متواصلة، قدر فريق الإطفاء يقوم بإخماذ الحريق والسيطرة عليه، ومازالة لحد الساعة أسباب اندلاعو مامعروفاش.
وعرفات غابة شفشاون سلسلة من الحرائق فالسنة الماضية، أتت على ما يزيد عن 250 هكتار من الغطاء الغابوي المشكل أساسا من شجر الصنوبر واعشاب أخرى ثانوية.
وكانت السلطات المعنية بإقليم شفشاون فتحات تحقيق، بإشراف من النيابة العامة المتخصصة، باش تحقق لمعرفة أسباب هاذ الحرائق الكثيرة بالمنطقة.