الموشكل الحقيقي لأي مغربي محارب مع الوقت باغي يدير السياحة هو ليالي المبيت والجودة مقارنة بالثمن المبالغ فيه.. ارخص برطمة غادي تلقاها بميتين درهم وهاد الثمن يالله يخليك تبات مغطي بمانطة عامرة بالمني وناعس على الطفية ديال الكارو بحال الى فالحبس

الموشكل الحقيقي لأي مغربي محارب مع الوقت باغي يدير السياحة الداخلية هو ليالي المبيت والجودة مقارنة بالثمن المبالغ فيه،بالنسبة لجوج ديال الناس ارخص برطمة فمدينة صغيرة وماشي فالموسم السياحي غادي تلقاها بميتين درهم، هاد الثمن يالله يخليك تبات مغطي بمانطة عامرة بالمني وناعس على الطفية ديال الكارو بحال الى فالحبس، بالنسبة بفندق خاصك من تلتمية وخمسين درهم لفوق الى بغيتي شي حاجة في ظروف إنسانية وبعيدة على المحطة وغادي تنعس فخاطرك وهادشي طبعا راك قابل بأقل شروط الراحة، في عز الموسم السياحي وخصوصا فالمدن الساحلية راه شي أيام تقدر تكري فيها بيت بخمسمية درهم لليلة وماتلقاهش وبرطمات مقادين كيوصلو حتى لألف وخمسمية درهم، وحتى فالمدن الصغيرة راه كتولي خاصك تلتمية درهم الى بغيتي تبات بالنسبة لأسرة صغيرة، هاد الأثمنة بالنسبة للقدرة الشرائية مبالغ فيها بزاف، وملي كتشوف ثمن المبيت فبلدان أخرى من غير المغرب وحسن منو فالبنية التحتية وفما يتشاف كتلقى أثمنة جد مناسبة وبزاف وخدمات ممتازة وإنسانية.
واحد الكوبل نكالزة تفرجت فيديو ديالهم دارو تسافيرة بالطوموبيل فالبرتغال، داروها كلها وشافو بزاف ديال البلايص وتساراو وذاقو بزاف ديال الاكلات ديال المناطق لي كانو كيدوزو منها سهرو برا ، عشاو فمطاعم زوينة شربو نبيذ البلاد وخداو معاهم كاع شي قريعات، والمسارية كلها بمازوطها ماوصلاتش ليهم لألف اورو علما أن هاد التسافيرة بالمعايير ديالنا راها لوكس، السبب فهاد الثمن القليل هو أنهم كانت معاهم خيمة والماتريال فين يباتو برا، وكانو كيباتو فمخيمات خاصة للكارافانات وصحاب الخيم، ومافايتاش مية درهم لليلة فيها الدوش والطواليط وكوزينة نقية كتشعل والويفي مطلوق بالإظافة إلى المكان كلو نقي وفيه بلاصة مخصصة الى بغيتي تشعل العافية والحطب كيتباع رزامي، وبحال هاد البلايص العالم عامر بيهم، والناس لي كيخيمو راه ماشي بالضرورة دوك الهيبيين لي كيسافرو بأقل التكاليف، لا كاين ناس كيبغيو يقتاصدو في ثمن المبيت باش يوفرو الفلوس من أجل يسهرو برا يتعشاو فبلايص زوينين يشريو حاجات من البلاد.
فالمغرب خيارات المبيت قليلة وبزاف، إما أوطيلات غادي يفرعوك فالثمن، أو برطمات غادي تنعس مخلط مع المني الممسوح فالكاشات تفاديا لولاد الزنى، وفكرة التخييم عندنا مرتابطة بالشباب الصغار لي باغين يدوزو تسافيرة بأقلب التكاليف باش يوفرو فلوس الزطلة، والبلايص لي ممكن تخيم فيهم فالمغرب راه عبارة على زبالات، ومافيهم لا نظام لا قانون لا تاحجة، والبلايص لي نقية في الغالب غير شي ولاد المنطقة لي كينقيوها وكيبداو يستغلوها يكريوها للي بغا يخيم، راه السياحة ماشي هي مراكش وتمانياتون ووينك يابوموضي، أو سياحة دانييل كالفان، السياحة راه انواع وفبلاد بحال المغرب لي بصح عندو إمكانيات طبيعية متنوعة، بزاف ديال السياح دارو فيديوات على تجربة السياحة بالتخييم فالمغرب ودازت عليهم خايبة بسباب النصابة وبالخصوص بسباب الزبل والأماكن الكثيرة الممنوع التخييم فيها، وحتى بالنسبة للسياحة الداخلية باش تخيم فالمغرب في ظروف إنسانية راه شبه مستحيل إلا نادرا وفشي قنات معينين.