تضامن كبير مع فنانين ديال ساحة مارشال. ومصدر من السلطات ل”كود”: هاد الشي عندو علاقة بالفن راهم ضربو مقدم وهو دعاهم

الفن ماشي جريمة. هو الهاشتاغ لي اختارو رواد الانترنت باش يضامنو مع جوج ديال لفنانة شدوهم البوليس، ودابة هوما في الحبس، حيت تناقشو مع رجال السلطة ملي جاو بغاو يحيدو ليهم الماتريال من ساحة مارشال. وتطور نقاش وضربو المقدم لي مسكتش على حقو حتى هو ودعاهم.
بدر معتز، والمهدي عشتاوي وجهو لهم تهم قاصحة، وكيواجهو دابة سجن مدة 5 سنين، حيت المقدم دفع شهادة طبية، وغادي تبدا المحاكمة الخميس جاي في عين سبع.
الوليدات لي في عمرهم 25 و28 عام، كيبغيو الموسيقى، وكيمارسوها في ساحة مارشال حدا ترامواي وطوبيسات، حيت معندهمش فين يبينو الفن ديالهم.
معظم المغاربة عارفين انه مكينش الفلوس في هادشي. حيت بزاف كيوقفو يتفرجو، وحتى واحد مكيشجع الفن. قليل لي يعطيهم درهم أو جوج. هاد دراري كيبغيو الفن وعايشين به.
ناس الانترنت وفايسبوك معجبهمش أن فنانين يدخلو الحبس. وضامنو معاهم بصورة فيها، وكل واحد كينش على كبالتو.
مصدر “كود” قال أن القضية وما فيها أن بعض أصحاب المحلات والسكان دارو شكاية على مكبرات الصوت.
أعوان السلطة، حسب مصدر “كود” قالو للدراري يحيدو المكبرات ويكملو الموسيقى أكوستيك، لكن هوما ما بغاوش.
وأكد مصدر من السلطات المحلية ل”كود”، أن المتضامين بغاو يرجعو القضية ديال الفن وداكشي، ولكن المشكل الاصلي والحقيقي هو خاص حل لمشكل استغلال الفضاء العام بساحة الأمم المتحدة، سوا من طرف الموسيقيين أو طرف الباعة المتجولين، حيت المتضرر الاول والأخير هوما هادوك لي ساكنين تما.