تدو ينة للباحث الاستاذ عبد اللطيف اگنوش تنشر لمواقفته /// الكنازة كبيرة، والميت فار، والتخلاط والتجلاط ما معاناش !! قال ليك نائبة رئيس وكيل الملك لابتدائية خريبكة تتهم رئيس المنطقة الإقليمية للأمن ديال خريبكة “بالإهانة” حينت قالت ليه ينوض يقوم “بمحاربة جريمة الاتجار في المخدرات”، وهو ما استاجبش ليها، وربما قال ليها بللي ماشي شغلها، والفرقة الوطنية للشرطة القضائية فتحات تحقيق في الموضوع، والأمر فتح نقاش بين رجالات القانون في الواقع وفي مواقع التواصل، وأن هاذ النقاش طويل وصعيب ودواو فيه شلا بنادم! وعلاش آخويا كًااااع هاذ النقاش من الأصل؟ قال ليك حينت النيابة العامة ووكيل الماليك ولا النواب ديالو رؤساء للشرطة، ورؤساء حتى ديال عبد اللطيف الحموشي وقائد الدرك الملكي ورئيس ديال رؤساء التمثيليات الأمنية بالمملكة…ولكن بلا ما يتقال آشنو هي طبيعة هاذ الرئاسة وآشنو المقصود بالشرطة في النصوص القانونية !! بالنسبة ليا هاذ النقاش خاوي حينت نقاش بيزنطي وماعندوش أدنى أهمية، علاش؟ وكيل الماليك (أو نائبو)، وللي هو سلطة قضائية، رئيس “وظيفي” لضباط الشرطة القضائية فقط…وماشي رئيس “إداري” لهاذ الشرطة…وكيل الماليك عندو الحق “يوججه الأبحاث ويوجه عمل ضباط الشرطة القضائية فيما يتعلق بالبحث الجنائي” فقط..ليس إلا..واتاقوووول… أما يقول ليه: “نوض حارب ليا جريمة الاتجار في المخدرات”..هاكككا…في المطلق…ماشي من حقو…حينت هاذا تدخل سافر في التسيير الإداري لمحاربة الجريمة، وتجاوز للسلطة، حينت وكيل الماليك أو نائبو ماشي شغلو التدبير الإداري الأمني للجريمة..سددينا… وعليه ومن وجهة نظري للي هي وجهة نظر القانون المغربي، الدرية نائبة وكيل الماليك ديال خريبكة، هي للي هانت في الحقيقة رئيس المنطقة، ماشي العكس…هاذا إيلى كان صحيح أنها هي للي بدات وقالت ليه “ينوض يحارب الجريمة”، حينت آخويا ماشغلهاش…وحق مولانا !!
