اوجار وزير العدل الجاي ما عندو سلطة. غير يعين الملك المجلس الاعلى ويتقدمو نصوص للبرلمان فقد الوزير غالبية سلطاتو

بعد ان تأكد رسميا ان الوزارة العدل والحريات ما بقاتش عند العدالة والتنمية وان مصطفى الرميد كاين فالحكومة ولكن ماشي فهاد الوزارة وهاد الشي اكدو مصدر مطلع ل"كود" وبعد ما نشرت "كود" البارح اقتراب محمد اوجار ديال التجمع الوطني للاحرار من هاد الوزارة. دابا واش باقي شي دور "وزارة العدل"؟
طبعا باقي غير هو غادي يولي بحال شي طاشرون تقريبا. مقابل البناء والموظفين وووو.
اولا مع استقلالية السلطة القضائية ما بقاش عند الوزير والو. هاد الاستقلالية غادية تدخل لحيز التنفيذ بعد ما يعين الملك محمد السادس اعضاء المجلس الاعلى للقضاء اللي تم انتخابهم هادي مرة.
بعد ستة اشهر غادي تستقل النيابة العامة عن وزارة العدل. الرميد دار كلشي تقريبا حتى النصوص جاهزة يجي الوزير يدافع عليها فالبرلمان وسالات القصة.
وعليه فمحمد اوجار اللي ما فيدوش لا باش كان وزير حقوق الانسان لا سفير فجنيف غادي يبقى مقابل المشاريع اللي طلقات كبناء المحاكم والمحكمة الرقمية اللي غادية تسالي ف2020.

مصطفى الرميد مازال فالحكومة فمنصب وزير دولة يعني مازال يعاون هاد الوزير