الكاف تاتفلا على الاسود .. جمع حوايجو وتايتسنى الطيارة

المنتخب الوطني حاصل دابا في مقر إقامة ديالو ببيتام بسباب الكاف. المسؤولين ديال الكونفدرالية الإفريقية اتاصلوا البارح مع الطناش ديال الليل بالمسؤولين على المنتخب الوطني وقالوا ليهم وجدوا راسكم راكم غاتلعبوا في بورجونتي وخاصكم تشدوا الطيارة هاذ الصباح مع لحداش. اللاعبين والطاقم وجدوا حوايجهم وفاقوا مع الستة ديال الصباح وفطروا وهبطوا الباليزات ديالهم قبل ما يصدمهم تليفون آخر مع الثمنية ديال الصباح. الكاف عيطات عوتاني وقالت ليهم تسناو الطيارة ما غاتديماري تالوحدة. المنتخب دابا حاصل فلوطيل تايتسنى بالباليزات ديالو, حيت ماشي معقول يمشي للمطار ويبقى يتسنا, بعدما لغى تداريب هاذ الصباح على أساس أنه غايسافر مع الحداش قبل ما تبدل ليه الكاف الببرنامج كامل.