مذكرات محمد سقراط في السجن حصريا على كَود الحلقة 84: " كنتصنتو للراديو، بعض المرات كاين لي كيكفت على بعض المكالمات من طرف المستمعات الأفاضل، وكانوا حقا شي مكالمات مثيرة جدا وجريئة جدا وكتحرك المخيلة+18

قبل مندخل للحبس كان الراديو عالم مجهول بالنسبة ليا، ماعارف آش كيطرى فيه وكنت كنتخايلو نسخة عن قنواتنا التلفزية و حتى الى كان شي فرق فراع غادي يكون جيهة الحموضة، ولكن تبين العكس.
أغلب صحاب الحبس الطويل كتلقى عندو الراديو مكيحيدوش من وذنو، أنا فاللول غي كنت مرة مرة كنشدو من عند واحد لعشير وكنتصنت، شوية لقيت راسي انغمست فعالم الراديو.

أول حاجة كان كيديرها شاف شامبري فالصباح هي المورنينغ دو مومو، كيطلقو مع السبعة ديال الصباح، الشامبري كلو كيتصنت حتى لحدود التمنية ونص، مرة مرة كان كيبدل الإذاعة جيهة قهوة الصباح ديال ميد راديو، من أجل أخبار الرياضة لا غير، حيث المقدمين ديال قهوة الصباح كانوا من أحمض خلق الله، خصوصا خاي جبيلو وواحد الدرية كاينة تما، المورنينغ ديال مومو كان هو احسن حاجة يمكن تسمعها فالصباح، كان كيخلق من شي حاجة تافهة موضوع زين، وهادشي لي بغات الوقت، بنادم كول وخفيف وذكي وسريع البديهة.

بنهار مكناش كنضيعو برنامج شروق غريب، طبعا مكناش كنتصنتوليه كل نهار وانما بالضبط نهار لخميس، حيث كيكون سي بوبكر حركات مختص فعلم لحوا، بعض المرات كان لي كيكفت على بعض المكالمات من طرف المستمعات الأفاضل، وكانوا حقا شي مكالمات مثيرة جدا وجريئة جدا وكتحرك المخيلة، وكانوا شي مكالمات من طرف بعض الذكور حتى هوما جد غريبة بحال واحد دورليهم وعاودليهم على مراتو لي أربع سنوات وهو مزوج بيها وعندو معاها جوج دراري ولكن قاليك أنها ديما كتسبوا و كتعايرو بصغر حجم قضيبه، بحال هادشي كيخرينا بالضحك، كتلقى بنادم داير الليزيات فوذنيه و كيهضر مع الراديو بحال هاد خينة واحد علق عليه: يا ولد القحبة سير شوف بعدا الدراري واش ولادك، وعلاش معيط للراديو آش غادي يديروليك يطولوه ليك.

واحد دورليهم، على أنه كان مصاحب مع مراتو قبل الزواج و كانو عاطيينها غي لضريب الزك، وملي تزوجو قالو أنه دابا راه ولينا مزوجين راه خاص نضربو غي القدام و نقلبو على اللور ولكن قاليك أن مراتو كتموت على اللور وحتى هو ولف معاها داكشي وبجوج كيتلذذو بديك الطريقة وكيسول بوبكر حركات واش حرام هادشي أو حلال، الأستاذ بوبكر قاليه أنه ماشي فقيه باش يقوليه واش حرام أو حلال، وبقا كيشرح ليه الأضرار الصحية لضريب الزك.
كانوا بزاف ديال لعيالات كيتاصلوا و كيتشكاو من ضعف رجالهم الجنسي وأنهم مكيحسو معاهم بوالو، ديك الساعة كان كيبقى البيضاوي ملي كيسمع بحال هادشي كيغوت: الله أميمتي الله الرجال جابوهم للحبس والزوامل بقاو برا.

من ناحية الموسيقى الصراحة، كنت مبرع مع ميدي آن طبعا ومع راديو أتلنتيك كان كيجيب بالعشية شي ربعة ديال السوايع ديال الروك، وحتى راديو دوزام، كان داكشي زين و جد متنوع والإختيارات عديدة.
بالليل طبعا كنا كلنا كنشدو موجة سمير الليل وواحد البرنامج آخر على شاكلته فراديو بلوس، وأراك للقصص والضحك، كانوا القصص لي كيتعاودو فيه ممتعة وغريبة ومضحكة، كاينة لمأساوية ومع ذلك كتبقى مضحكة بالنسبة لينا حنا لي كنا غارقين فمآساة حقيقية.

كانوا بزاف ديال لقحاب كيتاصلوا، وكيبقاو يعاودو على مسارهم القحبي من جبال خنيفرة أو من سهول الغرب أو من أي بقعة فالمغرب انتهاءا بكباريهات أكادير و مراكش و كازا و باقي المدن الكبرى، كانوا كيعاودوا على مأساة ربما بالنسبة للبعض لكن كانو كيتسمتعوا وهوما كيعاودو، وكنتي كتحس بيهم و نتا كتسمع بأنهم كيتباهاو ويكفتاخرو بما حققوه فحياتهم بإستخدام ما بين أرجلهم، واخا المقدم كيبقى يركز على كل ما هو مأساوي ولكن هوما ديما كيهربوليه ويبجاو يعاودو على الليالي الحمراء و الفلوس لي تخسرات عليهم، والمسؤولين لكبار لي تصاحبوا معاهم، وحدة واحد المرة قاتليه كانت مصاحبة مع وكيل الملك، قاليها المقدم وباش عرفتيه وكيل ملك، وهي تقوليه، راه كنت كندخل عندو حتى للبيرو باش يقضي ليا أو لصحاباتي شي غراض، كلهم كانوا كيعاودو على جمالهم وطايتهم وكيفاش أنهم من صغرهم وهوما زينات، كيعاودو على الرجال لي سمحو فعيالاتهم عليهم، وحنا كنا فالحبس كنتصنتوا و كنخايلو ومقيمين.

واحد كان عاود على مرتو كتخونوا، والمقدم كيقوليه:

_ واش شفتيها بعينيك أو غي عاودوليك، الخيانة راه أمر خطير و ماخاصكش تتسرع ماشي غي تسمع شي هضرة تيقها.
_ وهي لي قالتهاليا براسها.
خرينا بالضحك حنا ملي سمعنا هادشي حتى المقدم أبدى الإستغراب و عاود سولوا:
_ كيفاش هي قالتهاليك.
_ وا كتخوني مع الفقيه ديال الجامع وقاتلي راه ساحرليها، والله أسي مصطفى الى النهار كامل و هي غادا خيطي بيطي عند لفقيه هاهي دايالو لغدا ها هي دايالو لعشى، وأنا فالدار مكيبطى عليها غي فوقاش تحطلي لعشى وتزيد عندو.
_ ونتا كيفاش تعاملتي مع الخبر واش متحريتيش من الأمر ممشيتيش عند لفقيه.
_ وآش غادي نقوليك أسي مصطفى، راه ساحرليها، ساحرليها، راه عامين وهي على ديك الحالة مخليت فين زورتها، وواحد المرة نساتو شي شهرين ولكن راه غي كيحرك داكشي كتعاود تولي لعندو.

حنا راه كنسمعوا هادشي و كنخراو بالضحك فالنهاية بقى فينا هاد الراجل كاع، الصراحة بالراديو مكتعقلش على النهار أو الليل فوقاش كيدوز، كنت كنبقى سهران حتى للربعة ديال الليل أو لخمسة عاد كننعس .
ملي كنت كنتوحش الحومة والهدرة دلحومة وولاد البلاد، كنت كنمشي لإذاعة طنجة عند خاي عبد لطيف بنيحيى، كان أفضل مؤنس ليلي وكان حقا إذاعي متميز و خدام فإذاعة جد متميزة لي هي اذاعة طنجة.