الكابرانات وبواقهم ما رضاوش بالخسراة مع بركان والكاف: غنمشيو للطاس

قرر اتحاد العاصمة الجزائري يمشي للمحكمة الرياضية الدولية، بعدما ترفض له قرار استئناف العقوبة اللي سلطتها عليه لجنة المسابقات فالاتحاد الأفريقي، واللي ايدت القرار اللي صدراتو الأخيرة بمعاقبة الفريق الجزائري بخسارة ماتش ذهاب دومي فينال كاس الكونفدرالية الافريقية ب3 لزيرو، بسبب الغاء الماتش حيث الكابرانات حجزو على تونيات نهضة بركان اللي فيهم خريطة المغرب.
وحسب بواق نظام شنقريحة وتبون، ومن بينها قناة "الشروق" الجزائرية، فقررت ادارة اتحاد العاصمة الجزائري تمشي للمحكمة الرياضية الدولية "الطاس"، للطعن فقرار الاتحاد الافريقي لكرة القدم بمعاقبة الفريق بالخسارة فذهاب دومي فينال كاس الكونفدرالية امام نهضة بركان بنتيجة 3 لزيرو، مع احتمالية معاقبة الفريق بغرامات مالية.
وكتجي هاد التطورات بعدما وصلت بعثة اتحاد العاصمة هاد العشية إلى المغرب باش يلعبو مع نهضة بركان، وتم استقبال الفريق مزيان فمطار وجدة من طرف المسؤولين على الكورة المغربية والمسؤلين ديال نهضة بركان، والفريق الجزائري خدا الكار ومشى لوطيل اللي غيگلس فيه فالسعيدية.