نايضة فالجزائر بسبب خسارة اتحاد العاصمة مع نهضة بركان لماتش ذهاب كاس الكونفدرالية الافريقية، بقرار من الاتحاد الافريقي لكرة القدم، حيث الكابرانات كانو حجزو على تونيات الفريق المغربي فخرق سافر للقانون، وجمهور اتحاد العاصمة طالع له الدم وغاضب على السلطات الجزائرية ومسؤولين الكورة فبلادهم، وزادت كملت ملي USMA تقصات من دومي فينال كاس الجزائر. وتفرگعت جماهير اتحاد العاصمة الجزائري على السلطات الجزائرية والاتحاد الجزائري لكرة القدم فمواقع التواصل الاجتماعي، بعد قرار الاتحاد الأفريقي بخسارة الفريق امام نهضة بركان بنتيجة 3 لزيرو، وهذا الشي تسببت فيه قصوحية راس الكابرانات اللي حجزو على تونيات بركان بداعي انهم فيهم خريطة المغرب، وطبعا تصرف السلطات الجزائرية كان فيه خرق للقانون وهذا الشي خلا الكاف يتدخل ويلغي ماتش الفريقين فتيران 5 جويلية الاحد الماضي، ويحكم بفوز بركان ب3 لزيرو، وكملت المصيبة على جماهير اتحاد العاصمة ملي خسر الفريق البارح البيلانتيات مع شباب بلوزداد وتقصا من دومي فينال كاس الجزائر. جماهير اتحاد العاصمة عاقو انهم هما وفريقهم كانو ضحية مخططات غبية لنظام العسكر الجزائري، اللي كيحاول يستغل اي تظاهرة رياضية فالجزائر فيها فريق او منتخب مغربي باش ينفخ السم ديالو ويبين الحقد والحسد الدفين اللي عندو تجاه المملكة المغربية، وانهم تصيدو والطامة الكبرى هو ان الفريق خسر لقب بالإقصاء من كاس الجزائر حيث بقى مركز مع الكاف والحكم ديالو فواقعة ماتش نهضة بركان فكاس الكونفدرالية، ومطالب دابا باش يربح بنتيجة 4 لزيرو فبركان إذا بغا يتأهل إلى نهائي كاس الكونفدرالية، وهادي مهمة صعيبة بزاف إذا ما ما كانش مستحيلة، وبالتالي غيخسرو اتحاد العاصمة 2 ألقاب فسيمانا واحدة. ونايضة دابا جماهير اتحاد العاصمة للسلطات الجزائرية والاتحاد الجزائري لكرة القدم، اللي والا كيقول لاتحاد العاصمة يمشيو يلعبو ماتش الروتور مع نهضة بركان فالمغرب، فمحاولة منو باش يحد من تداعيات اعتداء الكابرانات على النهضة البركانية، وعقوبات الكاف تكون غير على USMA وما توصلش للمنتخبات الوطنية الجزائرية ومنها المنتخب الاول، والاندية الجزائرية الاخر الممثلة للجزائر فالمسابقات القارية، باش يتجنبو شي ثورة من جماهير الكروة فالجزائر على الكابرانات، اللي غير غاديين وكيعزلو فبلادهم قدام المجتمع الرياضي الدولي بعدما تفرشو سياسيا، مع العلم ان بيادق شنقريحة وتبون فرضو على منتخب الجزائر لكرة اليد الانسحاب من بطولة العرب للشباب المقامة فالمغرب، بعدما بداوها وما جاوش يلعبو الماتش ضد الأشبال، حيث المنتخب المغربي عندو خريطة المملكة المغربية فالتونيات، وكاينة الخريطة فالقاعة ديال ستاد دونور فكازا.
