ماكرون مدافعا على جيرار دو بارديو: ما غاديش نسحب منو الوسام. راه خلى فرانسا تفتاخر براسها

دافع الرئيس الفرنسي ايمانويل ماكرون البارح لاربعا 20 دجنبر 2023 فبرنامج "سي ا ڤو" على "فرانس 5" على الممثل الفرنسي الشهير جيرار دو پارديو٬ منتقدا ما سماه "مطاردة" هاد الفنان بعد بث وثائقي على "فرانس 2′′.
ماكرون قال انه من كبار المعجبين بهاد الفنان وانو قدم بزاف للسينما والثقافة الفرنسية. فنفس الوقت شدد على انو ما غاديش يسحب وسام رفيع كان خداه بناء على ما قدم لحد الان. هاد الجواب كيمشي ضد موقف وزيرة الثقافة الفرنسية ريما عبدو المالك اللي هدرات الجمعة اللي فاتت٬ وقالت باللي بدات الاجراءات لاسترجاع هاد الوسام.
ماكرون اكد باللي غادي يبقى عندو هاد الوسام وباللي ما يمكنش يساهم فمطاردة هاد الرجل وباللي قدر هاد الفنان يعرف بفرانسا فالعالم ورجع فرانسا فخورة براسها.
وكان الممثل قد نشر رسالة مفتوحة ف"لوفيگارو" نفى فيها الاتهامات بالاغتصاب والاعتداء الجنسي الموجهة ضدو وندد بما سماه قرار اعدامو بعد صدور حكم من قبل "محكمة الاعلام".
وقال الممثل الشهير "ما عمرني اعتاديت علي شي مرا".
وكانت ممثلات قدمن شكايات اتهمنه بالاغتصاب والسيمانا اللي فاتت قدمات صحافية صبليونية شكاية ب"طوري مولينوس" بالاندلس حتى هي كتاهم الممثل بالاعتداء عليها قبل سنوات باش بغات دير معاه حوار بباريس بعد خروج فيلم ديالو.