الجرايدي فتصريح مؤثر ل"كود": تمنيت ماما تفرح بيا فالمونديال ولكن ربي بغاها.. كانت هي سندي وقفت معيا وشجعتني

افتقدت ابتسام الجرايدي لاعبة المنتخب الوطني المغربي للسيدات لماماها، خلال الفرحة ديالها بالتألق مع ليكيب ناسيونال فمونديال السيدات 2023، لأنها توفيت، وهذا الشي مخلي عندها شعور خاص حيث كانت هي سندها فالكاريير ديالها.
واستحضرت ابتسام الجرايدي ذكرياتها مع الأم ديالها فتصريح مؤثر لموقع "كود"، وقالت: "الهدف اللي ماركيت كأول مغربية كتسجل فالمونديال، كان هديه لماما الله يرحمها، اللي كانت مسانداني وواقفة معيا وكتشجعني.. كنت بغيتها تكون حاضرة معي ولكن ما كتابش وربي بغاها".
ابتسام الجرايدي هدات هدفها على كوريا الجنوبية فمونديال السيدات لجميع المغاربة اللي ساندوها هي وصحباتها، وعطاتهم وعد أن المستقبل غيكون أحسن.