سفيان أمرابط: باغي دابا غير نرتاح

عبر الدولي المغربي سفيان أمرابط على الرغبة ديالو فالراحة، بعدما دوز موسم مشارجي بليماتش مع الفريق ديالو فالمنافسات الإيطالية والأوروبية ومع المنتخب الوطني المغربي فكأس العالم قطر 2022.
وخرج النجم المغربي سفيان أمرابط اللي كتنافس عليه أكبر الفرق الأوروبية وأكد أن الأولوية عندو دابا هي الراحة ديالو وقال فأنستغرام: "بعدما لعبت 62 ماتش مع الفريق والمنتخب الوطني، كان هذا هو أكثر موسم مشارجي فالكاريير ديالي".
وكمل أمرابط اللي باغي تسني معه البارصا وأتلتيكو مدريد وتوتنهام وفرق أوروبية أخرى، وقال: "كانت رحلة زوينة لعبت فيها دومي فينال كاس العالم مع المغرب، ووصلت فينال المؤتمر الأوروبي وفينال كأس إيطاليا، كنشكر عائلتي وصحابي وزملائي والمدربين وكل واحد عاوني، ودابا أن باغي غير نرتاح".