زجل .. فجر

من نهار حلمَتْ بيك الرّيح
و انتَ شادّ ف الحروفْ
شدّة الاعْمى
ف الحلْمَة
فاقت الريحْ
بقاوْ لي حْروفك
ورْث
( ... توحشتك يا المنفي لسْراب الاحلام
يا اللّي ف وجْهك
نار النّور
و طين الظّلام ... )
كُنتْ ناوي نصبّ سْكاتي
ف اوْذان الريح
غدرْني الكلام :
البحر:
توحّشْت السّفينة
و الغرقْ اللّي فيها
الفجر:
نجمة كَتمْشي فْ عينِيَّ
نجمة كنمشي ف عينيها
و الوْقوفْ تّحرقْ
ف بداية الطريقْ
خطواتْنا ... لْهيب الحريقْ
ج- الدالية:
ف خاطر المحبّة
كنشرب ايّامي
كاس يتبع كاس
د-المرايَة:
شْكون وقّفك يا ظلّي
عند الخطوة اللّولَى؟
واش اللّي لبّسك اللّيلْ
هو اللّي عرّاني من نْهاري؟
...
...
-الرّيح:
صباح المحبّة يا جرحي
شحالْ من مْدينة حرقْتِ ف غْيابي؟
صباح النّور يا جرحي
شحال من كلْمة بنيتِ ف كتابي؟
صباح الاحلام يا جرحي
منها جبتْ لك
عطشي و سرابي
صباح الدّهشة الشّاعلة على الدوام فْ عينيك
صباح الوْفَا يا جرْحي
يا البايتْ موسّدْ
عتبة بابي ..