زجل .. يورينكا

1
السكات.. كفن المحبة
يلا توحشات الموت ومشات تزورو
السكات.. صدى خطواتها
على الريح
لون الدمعة على خد شوقها..
2
هاذ «الهنا» اللي انا فيه
ما فيهش الوقت
و انا جاي،
كنت ف كل خطوة
كنتمحى
3
المكان علة الذات
الكلام علة الخاطر
كل ما نقول كلمة
من خاطري
يعطبها الريح
4
أنا و السكات صحاب
كلما يتوحشني
يعانقني
بلا ما يشاور
5
كيفاش يتغسل هاذ الكلام
بلا ما يغرق ف الموسيقى؟
و باش يتنشّف
بلا ما يتكفّن ف المعنى؟
- حتى المعنى الابيضْ، الصافي، كيجرحو -
6
القصيدة بنت اللحظة
اللحظة العذرا
يلا نفخ فيها الله
من روحو
7
شهوتي نتلف
ف الزمان
و نلقاني فيك
يا...
كلمتي الغارقة
ف السفر.
8
ف كل قلب
نخلة اسمها المحبة
شحال ما تعانقت القلوب
شحال ما كثروا
الواحات
9
كلما تولدت المحبة
تلقى ف المهد عاشق يقمّطها بالسكات
و يزرع
ف شجرة قبالة عينيه
روح التابوت.