التجمعيين لقدام غاضبين بزاف هاد ليام على قيادة الاحرار . والسبب: أغلب القيادات للي بناو الحزب في العقود الماضية كيحسو بللي ساعتهم سالات، وبللي الوقت بغات وجوه جديدة ونخب نقية ومكونة تكوين سياسي استعدادا للانتخابات ديال 2026. هاد التجمعيين لقدام للي موجودين اليوم فمناصب قيادية فالحزب، وفالبرلمان، وفالمجالس المنتخبة، والغرف المهنية.. وأغلبهم شتاغلو إلى جانب قادة بارزين فالحمامة على الأقل فالعقدين الماضيين.... هادو اليوم بداو كيخافو على مواقعهم وأيضا على مصالحهم وخاصة ملي بدات تفتح تحقيقات ومتابعات قضائية فملفات الفساد والريع للي تورطو فيها منتخبين كبار من مختلف الأحزاب. هاد التجمعيين لقدام كيحسو براسهم ما بقاو صالحين لوالو. قيادة الاحرار مبقاتش كتلاقى معاهم وحتى العراضات للي كان كيديرو فرمضان مادارهاش هاد لعام. وللي زاد أكد هاد الأمر هو أن حتى الاجتماع للي كيدار قبل من افتتاح الدورة الربيعية للبرلمان ماتدارش هاد لعام واخا أن هاد الدورة تزامنات مع حدث كبير ومهم جدا وهو التجديد النصفي لرئاسة وأجهزة مجلس النواب. وقد كانت الصدمة ديال البرلمانيين التجمعيين لقدام قوية بزاف مللي مصطفى بايتاس فاش جا يتلاقا بالبرلمانيين فاجتماع قصير مادامش أكثر من نصف ساعة باش يقرا عليهم أسماء المرشحين لرئاسة الفريق ورئاسة اللجان الدائمة والعضوية فالمكتب ديال مجلس النواب. هنا، وفالوقت للي كان الجميع كينتاظر أن يستمر رئيس الفريق محمد غيات في منصبه، كانت المفاجأه للي قراه بايتاس هو الاستغناء على غيات وإرساله ليكون النائب السابع لرئيس المجلس راشيد الطالبي العلمي، "الصديق اللذود" ديال غيات. هاد الأخير لحد الآن ماتهضماتش ليه هاد الضربة وكيستغرب أنه واخا ماشي متابع فشي ملف ديال الفساد، فقد تم الاستغناء عنه بطريقة أقرب للإهانة وبدون أدنى تفسير أو حتى إتصال هاتفي من قيادة الحزب. وللي زاد شعل الأمور هو للي تعين فبلاصت غيات: محمد شوكي، برلماني لا يتواصل إطلاقا وماعندوش علاقات مع الأحزاب والنقابات. أما المفاجأة الاخرى فهي اختيار لحسن السعدي رئيسا للجنة المالية. وجه شاب كيتواصل مع الصحافة وكان حاضر بقوة فاجتماعات لجنة المالية فنصف الولاية السابقة. قيادة الاحرار كيتهدر على تجديد نخبها. اللي مشاو ليهم المناصب كيحسو باللي تم التخلي عليهم وماشي بطريقة كلاص. أما ففريق التجمع بمجلس المستشارين، هاد الشي خلق نقاش واسع في إجتماع قال فيه رئيس الفريق محمد البكوري، حسب قيادي من لقدام للي حضر الإجتماع، "واقيلا خاصنا نمشيو فحالاتنا صافي." رئيس الفريق ديال الاحرار فمجلس المستشارين مللي طيرو زميلو فمجلس النواب بدا كيردد المقولة للي كتقول: أكلت يوم أكل الثور الأبيض ! هاد الغليان وصل للقمة ديالو فالحزب مللي صدر بلاغ ديال الناطق الرسمي للحكومة مصطفى بايتاس كيخبر فيه بللي تم تعيين، من قبل مجلس الحكومة، للصديق ديالو شفيق ودغيري ككاتب عام لوزارة العلاقات مع البرلمان. "أووواه، كيدارو ليها؟"، كيتسألو الأطر لقدام ديال التجمع. شفيق ودغيري، من موظف بسيط فالفريق ديال الحزب للي تم إدماجو فمجلس المستشارين ف 2016، وتم تعيينو مدير التشريع فوزارة العلاقات مع البرلمان فمارس 2022، هاهو اليوم كيتعين كاتب عام للوزارة ! لا، هادي بزاف، كيقولو الأطر لقدام ديال الحزب ومعاهم الأطر القديمة فوزارة العلاقات مع البرلمان. هاد الشي بدا كيخلق نقاشات قوية فالبرلمان وخاصة قبل ما يجي أخنوش باش يقدم الحصيلة المرحلية لنصف الولاية الحكومية، أمام مجلسي النواب والمستشارين. لحد الآن، الطالبي العلمي، رئيس مجلس النواب، هو للي فاتح قناة الحوار مع البرلمانيين ديال الفريقين، وكيستقبلهم فالمكتب ديالو وكيستامع للاستفسارات والتظلمات ديالهم، وخاصة للي كيحتجو على تعامل الوزراء معهم ومنهم خاصة الوزير مصطفى بايتاس. دبا مجموعة ديال البرلمانيين التجمعيين لقدام بداو كيفكرو يمشيو فحالهم. غير هي حتى قضية يمشيو ماشي فيدهم بوحدهم. هاد الأمر تم رصده فالبرلمان، بحيث مجموعة من البرلمانيين ومن أحزاب مختلفة، ومنهم التجمع الوطني للأحرار، بداو من دابا فاتصالات مع قيادات فالأصالة والمعاصرة لضمان الالتحاق بحزب التراكتور فالانتخابات المقبلة ديال 2026. واش رئيس مجلس النواب الطالبي العلمي قادر يطفي العافية للي شاعلة فالفريق التجمعي قبل ما يجي رئيس الحكومة عزيز أخنوش باش يقدم الحصيلة الحكومية؟.
