عبرو لاعبين المنتخب الوطني المغربي لكرة القدم داخل القاعة، على الفرحة ديالهم بالتأهل لفينال كاس افريقيا، ولكاس العالم، بعدما ربحو المنتخب الليبي فدومي فينال كوب دافريك، وأكدو أنهم دابا مركزين باش يربحو أنگولا ويخليو كاس أفريقيا فالمغرب. وهضر سفيان المسرار كابيتان المنتخب المغربي للفوتسال، وقال فتصريح ل "كود" بعدما ربحو أونگولا: "الهدف الاول وهو التأهل لكاس العالم تحقق، والماتش ضد منتخب ليبيا كان قوي وكنا رادين البال، حيث المباراة إقصائية وضد المنتخب الليبي اللي ديما كيلعب معنا وعارفنا مزيان، دابا خاصنا نخليو كاس أفريقيا فالمغرب وكنطالب من جمهورنا يجي يشجعنا، وحشومة ما نهديوش لهم هدا الكاس". وكمل المسرار: "الماتش ديال الافتتاح كان ضد منتخب أونگولا، ودابا الانگوليين غيدخلو يلعبو ضدنا الفينال وهما رادين البال مزيان، وحنا غنحاولو نصححو الأخطاء اللي درنا فالافتتاح ضدهم ومركزين باش نربحو اللقب ونخليوه فالمغرب". عبد الكريم أنابيا گول المنتخب المغربي حتى هو قال: "كنشكر كاع الجماهير اللي جات شجعتنا فهاد الماتش ضد ليبيا اللي ما كانش ساهل، والليبيين معروفين فالفوتسال، ومصنفين مع 3 الاولين فالقارة الأفريقية". وزاد گول المنتخب المغربي: "دابا تأهلنا وغنمشيو نخدمو على الماتش فينال اللي لاعبين فيه ضد منتخب أونگولا اللي لعبنا معهم فالدور الاول ونصلحو الأخطاء ديالنا ونفرحو الجماهير المغربية باللقب". سفيان الشعراوي ما خلاش الفرصة تدوز بدون ما يعبر على الفرحة ديالو بالتأهل للنهائي وما نساش صاحبو يوسف جواد اللي توعت فالماتش، وقال"قدنا نماركيو بزاف على منتخب ليبيا فالدومي فينال، وتقصحنا ملي توعت لينا صاحبنا يوسف جواد الله يشافيه، قدرنا نربحو وتأهلنا لفينال كوب دافريك ولكاس العالم". واكد الشعراوي: "حنا لاعبين فبلادنا باش نربحو كوب دافريك، واخا منتخب أنگولا منتخب صعيب وشفتوه فماتش الافتتاح كيفاش لعب، وحنا غنوجدو لهم دابا باش فالفينال نربحوهم، ونخليو الكاس فبلادنا".
