عرف الماتش بين الوداد الرياضي وكلاكسي البوتسواني قبل البداية ديالو اليوم السبت فتيران مراكش، ضمن الجولة 1 من كرويات دوري أبطال افريقيا، قيام الفريق البوتسواني اللي ربح المباراة بواحد لزيرو بطقوس غريبة. عناصر فريق كلاكسي البوتسواني رشو شي تخربيق فشي شكل بجنب البولوز ديال التيران، قبل ما يبدا الماتش من واحد القرعة ديال الما. هذه الخوزعبيلات كتأكد ان القارة الافريقية مازال غارقة فالشعوذة والتخربيق اللي ما يكدخلش للعقل، وشي وحدين من الجمهور المغربي وجمهور الوداد، متيقين انه هذا السائل اللي رماو لاعبين كلاكسي هو اللي خلاهم يربحو الماتش. والواقع كيقول ان هذه الطقوس كتبقى ديالهم وهما احرار يؤمنو باشما بغاو، ولكن المنطق والعقل كيقولو ان ماشي هاد التخربيق هو اللي ربحهم، ولكن المستوى الكارثي ديال الواك هو سبب الخسارة وطبعا القتالية ديال الفريق البوتسواني، والوداد خاصهم يديرو تبليغ واعتراض عند مندوب الماتش على الفعل ديال لاعبين كلاكسي حيث رشو جسم غريب فالتيران وهذا هو القانون.